«Qazaq eli» Kaırde top jardy

«Qazaq eli» anımasııalyq fılmi Kaır qalasynda ótken onynshy ha­lyqaralyq anımasııalyq fılmder forýmyna qatysyp, úsh birdeı júldege ıe boldy. Ádette, úlken ister Almaty men Astanada atqarylatyndaı kórinedi. Al osy túsiniktiń kóbesin shymkenttik «Saq» stýdııasynyń jigitteri sókti. – Bizdiń stýdııada jasalǵan fılmdi Kaırdegi halyqaralyq fo­rýmǵa shaqyrtý alǵan Sháken Aımanov atyn­daǵy «Qazaqfılm» AQ óz ónim­­derimen birge jibergen eken, deıdi «Saq» stýdııasynyń dırektory Nýrıd­dın Pateev. – Kaırde ót­ken fo­rým­nyń mańyzdylyǵy sol, oǵan AQSh, Qytaı, Reseı, Germanııa, Fransııa, Ońtústik Koreıa syndy memleketter qatysqan, 90-nan astam qysqa metrajdy jáne tolyq metrajdy fılm­der usynylǵan. Osynaý alamanda bizdiń «Qazaq eli» fılmi «Eń úzdik tolyq metrajdy fılm» júldesine ıe boldy. Kartınanyń kompozıtory Rýslan Shynyqulov jáne fılmniń áýenin jazǵan mýzykant Janbolat Ádilov qurmet dıplomdarymen marapattaldy. – Bul – qazaq anımasııasy sala­syn­daǵy eń úlken jetistik, – deıdi kartınanyń rejısseri Batyrhan Dáý­renbekov. – Biz buǵan deıin de shet elde osyndaı jobalarǵa fılmimizdi usynǵanbyz. Sonda anımasııa sala­syndaǵy sheteldik sarapshylar «Qazaq elindegi» patrıottyq tárbıeniń kó­rinisin joǵary baǵalaǵan. Balalardy patrıotızmge tár­bıeleýde óte qundy dúnıe bolǵan­dyqtan, barlyq halyqqa kórsetýge bola­tyn týyndy» degen pikirlerdi estip, qýa­nyp qalǵan edik. Endi, mine, Kaır­degi festıval jeńisteri sol pi­kirler­diń shynaıylyǵyn dáleldedi. – Aý, aǵaıyn, júlde qoldaryńa tıdi me? – «Qazaq elin» Sháken Aı­ma­nov atyndaǵy «Qazaqfılm» jiber­genimen, mamandary barmaǵanǵa uq­saıdy. Bizdiń estýimizshe, bul júl­delerdi Kaırdgi Qazaqstan elshisi qabyldap alǵan. Bú­ginde jolda kele jatqan bolýy kerek. – Úlken stýdııalar jasaıtyn ju­mys­ty shaǵyn stýdııamen-aq atqaryp, halyqaralyq synda úzdik shyǵyp jatasyńdar? Jan-dúnıelerińde ne bolyp jatqanyn túsinemiz. – Ras aıtasyz. Osy habardy estigeli Shymkentke syımaı júrmiz. Bul bizdiń stýdııanyń ǵana emes, osy jumysqa tapsyrys bergen Mádenıet jáne sport mınıstrliginiń, atap aıtqanda, mınıstr Arystanbek Muhamedıuly men tarıh ǵalymdarynyń doktory Jambyl Artyqbaı jáne qazaqtyń kórnekti jazýshysy Dýlat Isabekov aǵalarymyzdyń de jeńisi. «Qazaq eli» – ujymdyq eńbek. Sondyqtan, barsha qazaqstandyqtardy, fılmniń túsirý tobyn osy jeńispen quttyqtaǵymyz keledi. «Saq» kınostýdııasynyń negizin qalaǵan qos jigit osylaı deıdi. Qazaqtyń alǵashqy handary Kereı men Jánibek arqyly elimizdiń taǵdyr baıany kórsetilgen fılm osylaısha iri jeńisterdi baǵyndyra bastady. Baqtııar TAIJAN, «Egemen Qazaqstan» Ońtústik Qazaqstan oblysy