Nıderlandtyq Úlken Pıter Breıgel degen sýretshi 1560 jyly «Balalar oıyndary» atty kartınasyn dúnıege ákelipti. Qudaı-aý, ana kartınada balalardyń jybyr-jybyr qımylyn kórgende, oıynnyń kóptigine eriksiz tańdaı qaǵasyz. Zertteýshilerdiń esepteýinshe, sýretshi kartınasynda 200-ge jýyq oıyn balasyn beınelegen kórinedi. Oıyn túriniń ózi 100-den asyp jyǵylady. Kartına quddy tórtkúl dúnıede qansha halyq bar, solardyń oıyn túrleriniń ensıklopedııasy ispetti.
Árıne, á degennen sizdiń oıyńyzǵa «qazaqtyń qandaı oıyny bar?» degen saýaldyń sap ete qalatyny sózsiz. Saspańyz, Breıgelińiz asyq oıynyn da ádemi beınelepti.
Kezinde «oıynyń osylǵyr» degendi úlkender jaǵy oıynnyń qyzyǵyna berilip, der kezinde úıge kele qoımaǵan balalarǵa qarata aıtqan bolýy kerek. «Oıyny osylǵannyń» kókesin adamzat balasy endi bastan ótkizip otyrǵan tárizdi. Breıgel beınelegen bes ǵasyr burynǵy oıyndaryńyz ádira qaldy qazir, búgingi «ıgromanııanyń» qasynda olar jip ese almaıdy. Oınap júr degen aty ǵana, balanyń kózi de, kóńili de ǵalamtorǵa birjola baılanǵan. Balalardy júgirip, sekirip, jasyrynyp oınaıtyn alýan túrli oıynmen aldarqata almaısyz, olardy bir-aq oıyn arbap alǵan. Internet-oıyn.
Qysqasy, «ıgromanııańyz» toǵyz baldyq silkiniske bergisiz kúshpen HHI ǵasyr balalarynyń sanasyn solqyldatyp, kúndiz-túni ýlap jatyr. Oıyn emes, opat. Al «Kók kıt» degen oıynyńyz tipti órenderdi ólimge májbúrlep, sorlatyp-aq tur. Osylaısha, bir-aq oıyn – ınternet-oıyn urpaqtyń bolashaǵyn búldiretin túri bar...
Jýrnalıst pen Sýretshi
