Sergeı Shavernev: «Barys» baryn salýy qajet

Hokkeıden Qazaqstan boıynsha birinshi memlekettik jattyqtyrýshy Sergeı Shavernev «Barystyń» Qurlyqtyq hokkeı lıgasynyń pleı-off kezeńinde Chelıabide «Traktor» ujymyna qarsy kezdesýi jaıly oı bólisti. «Buǵan deıin aıtqanymdaı astanalyqtar úshin bul yńǵaıly qarsylas. «Barys» «Traktordyń» jibergen barlyq qateligin tıimdi paıdalana bildi. О́zderińiz kórgendeı Konstantın Pýshkarev osy maýsymdaǵy eń jyldam gol soqty. Biraq Dastın Boıd, Naıdjel Doýs oraıy kelgen tustardy jibere qoımaıtyn tis qaqqan sportshylar. Esep 3:0 bolǵan kezde qorǵanysqa kóbirek kóńil bóldi. Bul da óz kezeginde nátıjesin berdi», – dedi Shavarnev. «Alǵashqy oıyndy negizgi ýaqytta iri eseppen jeńgenge ne jetsin! Pleı-offta basyn jeńispen bastaý mańyzdyraq. Bul «Barys» oıynshylarynyń boıyna senimdilik uıalatty. Biraq aldaǵy matchta «Traktor» ese qaıtarýdy oılaıdy. Bosańsýǵa bolmaıdy», – dedi ol. «Barysty favorıt dep aıtýǵa bolar ma edi. Biraq birinshi oıyndy ótkize salyp mundaı sheshimge kelgen durys emes. Ekinshi matchty utqannyń ózinde úlesi 50-50 bolady. Bul hokkeı, muz aıdynynda biz oılamaǵan jaıttar bolýy múmkin», – dedi eks-jattyqtyrýshy. Aıta keteıik, qos komandanyń arasyndaǵy alǵashqy matchta «Barys» «Traktordy» 5:2 esebimen jeńgen. Elordalyqtar sapynan Konstantın Pýshkarev, Naıdjel Doýs, Dastın Boıd, Brenden Shınnımın, Vladımır Merkelev alǵashqy eki kezeńde mergendigimen tanylsa, «Traktor»  áýpirimdep júrip sońǵy 20 mınýtta Vıtalıı Kravsovtyń jáne Iýrıı Petrov kómegimen esep aıyrmashylyǵyn qysqartty. Kelesi oıyn erteń Chelıabide 17:30-da (Astana ýaqyty boıynsha) bastalady. Tikeleı efırden KazSport arnasy kórsetedi. Al kelesi eki oıyn Astanada ótedi. Elordalyq ujym pleı-offqa osymen segizinshi ret qatysyp otyr. О́tken jyldy esepke almaǵanda bul kezeńge 2008/2009 maýsymynan beri shyǵyp júr.