Boıjetken mal bordaqylaýmen aınalysady

Jasyratyny joq, aýyl sharýashylyǵy dese kóz aldymyzǵa birden egde adamdardyń elesteıtini ras. О́ıtkeni, búgingi jastardyń kóbi mal ósirgendi, ony baǵyp-qaqqandy beınetti kásip sanaıdy. Qıyndyǵynan qashady. Alaıda ata kásipke adaldyq tanytyp, mal sharýashylyǵymen shuǵyldanyp júrgen jastar da joq emes. Kóp bolmasa da, bar. Sondaı at tóbelindeı az jastyń biri – Kúrshim aýdanynyń 20 jastaǵy turǵyny Saıa Aqanova. Byltyrǵy jeltoqsan aıynda bor­daqylaý alańyn ashqan boıjetken bul kásipke kezdeısoq kelgenin aıtady. Saıa Aqtóbe qalasyndaǵy kolledjderdiń birinde baılanys salasy boıynsha bilim alypty. Oqýyn bitirgennen keıin týǵan jerine keledi. Biraq mamandyǵy boıynsha jumys tabylmaıdy. Qol qýsyryp, qarap otyratyn emes. Dıplomdy sandyqtyń túbine salady da, mal bordaqylaýmen aınalysýdy jón dep tabady. Qyzynyń ıdeıasyn ata-anasy da quptaıdy. Sóıtip, ol alyp-ushyp aýdandyq jumyspen qamtý ortalyǵyna barady, sol jerdegi mamandardyń aqyl-keńesin tyńdaıdy. Sodan, «Jumyspen qamtýdyń jol kartasy-2020» baǵdarlamasy arqy­ly 1,5 mln teńge nesıege qol jetkizip, 11 iri qara satyp alady. – Nesıeniń qujattaryn resimdeý ju­mystary qıyn eken. Talaı ýaqytym soǵan ketti. Al mal tańdaýǵa ákem kómek­testi. Maldyń baǵasyna kelisý, saýdalasý ońaı sharýa emes eken, – deıdi Saıa. Aýdan ortalyǵy – Kúrshim aýylynda turatyn boıjetken qazir otbasymen birge kún-tún demeı nesıege alǵan sıyr­laryn kútip, baǵyp júr. Qystyń kózi qyraýda malǵa qaraý da ońaı sharýa emes. Sondyqtan Saıa bul tarapta ákesi men mekteptegi baýyrynyń kómegine súıenedi. «Nesıe meniń atymda bolǵanymen, sharýa bárimizge ortaq. Olar bolmaǵanda bul iske kirispeýim de múmkin edi. О́ıtkeni, bız­nes-jobamnyń ataýy «Otbasylyq mal bor­daqylaý alańy» dep atalady», deıdi ol. Osyndaıda aqyn Qadyr Myrza Áliniń aıtqan «Bıznes degeniń bireýdiń aqshasyn urmaı-soqpaı tar­typ alý» degen sózi eske túsedi. Ázilge buryp aı­tyl­sa da, rasynda, bıznespen shuǵyldaný ekiniń biriniń qolynan kele bermeıtin kásip ekeni anyq. 20 jastaǵy boıjetken mal bordaqylaýǵa kirispes buryn kásipkerler palatasynyń aýdandyq fılıalynda bıznestiń álippesin meńgeripti. – Bizdiń uıymǵa ýyljyp turǵan jas qyz kelip, aýylda kásip ashqysy kele­tinin aıtqanda, tańǵalǵanymyz ras. О́ıt­keni, Saıanyń zamandastarynyń kóbi eshkim jaıly jumys daıyndap turmasa da, qalaǵa umtylady ǵoı. Keıin onymen sóılese kele, qandaı isti qolǵa alsa da, orta joldan tastamaıtynyna sendik. Bizdiń fılıalda oqı júrip, ózi úshin eń qolaıly kásip mal bordaqylaý degen sheshimge kelipti. Rasymen kúte bilse, maldan túser bereke kóp qoı, – deıdi fılıal dırektory Svetlana Kýdedaeva. Eńbeksúıgish Saıa qazirgi ýaqytta О́sk­emen­­degi kolledjderdiń birinde mu­ǵa­lim mamandyǵyn syrttaı oqyp jatyr eken. Keleshekte ustazdyqpen birge ata ká­sipti qatar alyp júrgisi keletinin de jasyrmady. – Kóp kásiptiń ishinen mal bordaqylaý jobasyn tańdap alǵanyma ókinbeımin. О́ıtkeni, bul istiń qyr-syry bala kezden tanys. Eń bastysy, aınalysyp júrgen kásibim ózime unaıdy. Maldyń kútimine aralasýdy ar sanamaımyn. Mal baqqanǵa ǵana bitedi ǵoı, – deıdi Saıa Aqanova. Azamat QASYM, «Egemen Qazaqstan» Shyǵys Qazaqstan oblysy