«Aqtóbe» maýsymǵa daıyn

Kúnparaǵymyzǵa kóktemniń alǵashqy aıy – naýryz kelip kirdi. Sonymen birge, bıylǵy fýtbol maýsymy da esik qaǵyp tur. О́tken jyly júldege ilige almaǵan «Aqtóbe» fýtbol klýbynyń bıylǵy maýsymǵa ázirligi qandaı deńgeıde? Bul saýaldy bas bapker Igor Rahaevqa qoıǵan edik. Onyń aıtýynsha, aqtóbelik fýtbolshylar osynyń aldynda Túrkııada oqý-jattyǵý jumys­taryna qatysyp qaıtypty. Biz barǵan kezde olar kásibı sheber­likterin odan ári shyńdaý maqsa­tynda Shymkent qalasyna attan­ǵaly jatyr eken. «Aqtóbe» fýtbol klýby bıylǵy maýsymdaǵy alǵashqy kezdesýin Almatynyń «Qaıratymen» ótkizetini jónindegi derekke de osy jerde qanyqtyq. Klýbtyń ótken jylǵy quramy ájeptáýir ózgeriske ushyraǵanyn aıta ketken jón. Sonyń ishinde negizgi oıynshylar túgelge jýyq jańartylǵan. Dál búgingi kúni komanda quramynyń úlken toby elimizden tys jerden shaqyrtylǵan fýtbolshylar bolǵanymen, oblys ákimdigi belgilegen baǵyt pen baǵdarǵa sáıkes, «Aqtóbeniń» qu­ramyn jergilikti jas­tarmen to­lyqtyrý jumystary da qatar júr­gizilýde. Bul úshin bolashaq kásibı fýtbolshylardy tárbıeleý isi qolǵa alynǵan. О́ńirdiń barlyq aýdandarynda oblystyq fýtbol ortalyǵynyń fılıaldary qyzmet isteıtini de osy sózimizge dálel bola alady. Qazir jańartylǵan komanda quramynda jergilikti toǵyz fýtbolshy bar. Solardyń biri – ótken jyly sheber oıynymen jáne dál soqqylarymen kózge túsip, jan­kúıerlerdiń rızashylyǵyna bó­lengen Baǵdat Qaıyrov. Osy ara­da óziniń «Aqtóbesine» qaıta oralǵan Andreı Sıdelnıkovtiń atyna da oń pikir, jyly lebiz bildire ketkenniń artyqshylyǵy joq. Sóz sońynda «Aqtóbe» fýtbol klýbynyń oıynshylary jańa maý­symda óz jankúıerlerin jaqsy nátıjelerimen qýantady dep senim bildirgimiz keledi. Temir QUSAIYN, «Egemen Qazaqstan» AQTО́BE