Álı Ahmedov: Tájirıbeli boksshymen judyryqtasamyn

Qazaqstandyq kásipqoı boksshy Álı Ahmedov (5-0, 4KO) Varshava qalasynda brıtanııalyq Patrık Mendıge (17-11-2,1KO) qarsy ótetin jekpe-jegine daıyndalyp júr. «Alǵashynda aıqasym 11 naýryz kúni London qalasynda ótýi tıis edi. Biraq uıymdastyrýshylar bul keshti sáýir aıyna aýystyrǵandyqtan, men de josparymdy ózgerttim. Polsha elinde sharshy alańǵa shyǵatyn múmkindigim paıda boldy. Gambııa jerinen shyqqan brıtanııalyq Patrık Mendımen judyryqtasatyn boldym. Maǵan qaraǵanda tájirıbesi áldeqaıda kóbirek boksshy. Birneshe tıtýldy jekpe-jek ótkizgen. Álemdegi úzdik elý boksshynyń qataryna kiredi», – dedi Ahmedov. «Men biraz ýaqyttan beri daıyndalyp júrmin. Qazir jattyǵý jumystarym qaýyrt júrip jatyr. Birneshe sparrıng ótkizdim. Daıyndyǵymnyń negizgi bóligin aıaqtadym desem de bolady. Endigi mańyzdysy sharshy alańǵa senimdi túrde shyǵý», – dedi 21 jastaǵy boksshy. «Qarsylasym Patrık Mendıdiń biraz aıqasyn kórdim. Jekpe-jekterin negizinen Anglııa men Germanııada ótkizedi eken. Buǵan deıin reseılik Dmıtrıı Chýdınovpen tıtýldy urys ótkizgen. 12 raýndtyń qorytyndysy boıynsha tóreshilerdiń sheshimimen teń aıaqtalypty. Keıinirek, brıtanııalyq Kallým Smıtpen qolǵap túıistirgen. Olımpıada oıyndaryna qatysqan fransııalyq Hassan N’Jıkammen de kúsh synasqan. Osyǵan qarap-aq tájirıbeli sportshy ekenin ańǵarýǵa bolady», – dedi qazaqstandyq boksshy. «Qoldaryn tómen ustap, bokstasady. Barlyǵyna daıyn, 12 raýndqa tolyqtaı shydas beretin bilikti boksshy. Qazir tyńǵylyqty daıyndalyp júrmin. О́zime degen senimdiligim de joǵary. Patrıkti jeńý úshin boıymda barlyq qabilet bar. О́zimdi jaqsy qyrymnan kórsete alamyn dep oılaımyn», – dedi ol. Varshavada ótetin urysynan keıin Álı Ahmedov Anglııada uıymdastyrylatyn boks keshinde de sharshy alańǵa shyǵýdy josparlap otyr. «Buǵan da daıynmyn dep oılaımyn. Bir aıda eki birdeı jekpe-jek ótkizip, stýdentter arasynda álem chempıonatyna qatysqan kúnderim de boldy. Sondyqtan bul maǵan tańsyq emes», – dedi Álı Ahmedov.