Almatyda "Qazaqtyń tanymal hanymdary" atty kórme ótti

Kóktem kelgen saıyn jigit ataý­lyǵa gúl tasytyp, jylyp sala bergen kúnmen birge qabaǵy jip­sı qalatyn Almatyny kór­seń – Analar merekesinde kór!.. Almaty dese, «Arý qala» degen tirkestiń tilge orala beretini nesi eken... Sóıtsek, Táýel­sizdikti qun­daqtap besikke bó­legen Almaty – Er­kindiktiń ana­sy eken ǵoı. Qazaq balasy sonaý Jeltoqsanda er-aza­matpen qatar turyp, elim dep uran salǵan qyzdarǵa qaryz­dar. Qazaq qyzynyń sol kez­­degi erligi qysyltaıańda týa salǵan kezdeısoq áreket emes, babalarǵa jar bolǵan, batyr­­larǵa ana bol­ǵan áje­ler bo­ıyn­daǵy qasıet pen namys­tyń ǵasyrlardy kókteı ótip, urpaqtyń qanynda búlk etken bir sátiniń kórinisi edi. Almaty-Ana soǵan kýá bolypty... Urpaq jalǵastyǵy, dástúr sabaqtastyǵy degen búgin ǵana aıtylyp júrgen kep qoı deımisiz, eldik jolynda er-aza­matqa tirek bolǵan, syn saǵa­ty týǵanda gúl ustaıtyn qoly­na qarý alyp, maı­danǵa kirý­den de taıynbaǵan alyp analardyń beınesi ár zamanda ózinshe úlgimen qasterlenip, qasıettelip kelipti. Dátińiz jetse, máńgi tarıhtan oıyp turyp oryn alǵan Qazaq qyzyn sanap taýysyp kórińiz! Osyndaı tarıhı tul­ǵa­lar­dy búgingi urpaqqa úlgi etý maq­­­satynda Almaty qala­lyq máde­nıet jáne arhıv­ter bas­qar­ma­sy jáne Alma­ly aýdandyq ákim­diginiń qol­daýymen Women of Kazakhstan beıkommersııalyq uıymy men «Almaty qala­sy mýzeıler birlestigi» «Qazaq­stan­­­nyń tanymal hanymdary» taqy­rybynda kórme uıym­­das­tyr­dy. Kórmege 25 portret (sý­ret­shi Lıdııa Drozdova sal­ǵan), birneshe tarıhı-derekti eń­bek, ashyq hattar, 1930-jyldar­dan beri qazaq áıelderi al­ǵan bir­­qatar tósbelgiler, Táýel­siz­­­dik jyldarynan beri qazaq qyz­­dary­nyń qurmetine arnaıy shyǵa­ryl­ǵan markalar, konvertter, kún­tizbeler qoıyldy. Sharany uıymdastyrýshy Women of Kazakhstan uıy­my­nyń dırektory Dınara Asanova­­nyń aıtýynsha, kórmege qo­ıyl­ǵan zattardyń bári onyń atasyna tıesili. Belgili ǵa­lym, fılolo­gııa ǵylymdarynyń dok­tory, professor, akademık Shora Sarybaev kóp jyldar boıy aralasqan, kózin kórgen, dos bolǵan tulǵa­lar­dyń fotosýretterin, qazaq qyzdary alǵan ártúrli medal, orden, markalar men konvertter kolleksııasyn jınaǵan. Kórmeni uıymdastyrý ıdeıasy da osydan shyqsa kerek. Dınara atasy bastaǵan isti resmı túrde qol­ǵa alyp, jaqynda Qazaqstan Ulttyq kitaphanasynda úlken kólemde kórme ótkizipti. – Halyqaralyq áıelder kúni­ne oraı uıymdastyrylǵan kór­me­ge jalpy qordaǵy materıal­dar­dyń on paıyzy ǵana usy­nyl­dy, – deıdi Dınara Asanova. Uıymdastyrýshylar 1950- jyl­­dardan beri jınalǵan mate­rıaldardyń qoryn ulǵaıtýdy josparlap otyrǵan kórinedi. Al, negizgi maqsat – aldaǵy ýa­qyt­ta Qazaqstanda áıelder mýzeıin ashý. Kórmeniń taǵy bir artyq­shylyǵy – ulttyq óner men áde­­bıetke, qoǵam men ǵylym-bilim­­ge orasan úles qosqan qazaq qyz­dary týraly jan-jaqty máli­met berýdi maqsat etkeni. Kór­meni tamashalaýshylarǵa aqyn Saradan bastap Álııa, Mán­shúk, odan beri tartqanda álem­di jalt qaratqan moń­ǵolııa­lyq búr­kitshi qyz Aıshol­pan Nur­ǵaıyp­qa deıingi ara­lyq­taǵy qazaq arýlarynyń ómir­baıa­ny, jetistigi, ádebı-máde­nı mu­ra­lary jaıly maǵlumat berildi. Almas NÚSIP, «Egemen Qazaqstan» ALMATY