Tarazda jas ǵalymdardyń halyqaralyq konferensııasy ótedi

30 naýryz kúni Taraz memlekettik pedagogıkalyq ınstıtýtynda «Jas ǵalym – 2017» atty Halyqaralyq ǵylymı-praktıkalyq konferensııasy ótedi. Bul týraly oqý ornynyń Aqparattyq-ımıdjdik qyzmetiniń jetekshisi Jandar Asan habarlady. Onyń aıtýynsha, altynshy ret uıymdastyrylǵaly otyrǵan alqaly jıynǵa Qazaqstannyń barlyq aımaǵyndaǵy joǵary oqý oryndarynyń stýdentteri, magıstranttary men doktoranttary qatysady. Sondaı-aq, sharaǵa otandyq jáne sheteldik arnaıy bilim berý mekemeleriniń qyzmetkerleri de shaqyrylǵan. Pedagogıkalyq oqý orny konferensııany elimizdegi jas ǵalymdardyń shyǵarmashylyq qabiletin shyńdaý úshin eki jylda bir ret uıymdastyrady. Bıylǵy keńes TarMPI-dyń 50 jyldyǵyna arnalyp otyr. Konferensııanyń basty maqsaty – jas ǵalymdardyń jasampazdyq áleýetin damytý, olardy zamanaýı ǵylymnyń mańyzdy máselelerin sheshýge belsendi túrde tartý, ǵylymı bilim berý keńistigin damytý. Sondaı-aq, jıynnyń taǵy bir kózdegeni – izdenýshilerdiń ózara baılanys ornatýlaryna, tájirıbe almasýlaryna yqpal jasaý. Aıta ketý kerek, bul oraıda Taraz memlekettik pedagogıkalyq ınstıtýtynda birqatar keshendi sharalar josparlanyp, iske asyrylýda. «Jastardyń shyǵarmashylyq, ǵylymı-zertteý jumystaryn nasıhattaý men ony keń kólemde jarııalaýda, olardyń tulǵalyq damýdyń tásili retindegi jobalyq zertteý is-áreketterine tartýda jáne bilim berý úrdisiniń tıimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jıyndardyń mańyzy zor,» – deıdi J. Asan. Bıylǵy konferensııa gýmanıtarlyq jáne jaratylystaný ǵylymdary seksııalary boıynsha ótkiziledi. Jıyn barysynda qazaqstandyq jas izdenýshilerdiń ǵylymı jetistikteriniń kórmesin ótkizý, otandyq jáne sheteldik ǵalymdardyń jastarǵa arnalǵan sheberlik synyptaryn júrgizý josparlanǵan. «Konferensııaǵa kelip túsken materıaldar negizinde arnaıy jınaq shyǵarý kózdelip otyr. Bul óz kezeginde elimizdegi izdenýshi jastarǵa, ǵylymı jumystarmen aınalysatyn ǵalymdarǵa jáne ınnovasııalyq damý strategııasyn josparlap, júzege asyrýshylar úshin mańyzdy teorııalyq jáne ádistemelik kómekshi qural bolmaq», – dep atap ótti ol.