Damır Ryspaev: Soltústik Amerıkaǵa ketýdi josparlap júrmin

Qurlyqtyq hokkeı lıgasynda (QHL) merzimsiz jazaǵa ushyraǵan «Barys» oıynshysy Damır Ryspaev aldaǵy ýaqytta Soltústik Amerıkaǵa jol tartýy múmkin ekendigin málimdedi, dep habarlady shaiba.kz. Buǵan deıin QHL ókilderiniń biri Ryspaevtyń jazasy eshqashan keshirilmeıtinin aıtqan bolatyn. «Bárińiz biletindeı, 18 tamyz kúni «Kýnlýn Red Starmen» bolǵan oqıǵa úshin merzimsiz jazaǵa ushyradym. Tek jarty jyldan keıin ǵana bul isti qaıta qaraý kerek bolatyn. Biraq áli naqty jaýap bolmady. Sondaı-aq, Halyqaralyq hokkeı federasııasy da dıskvalıfıkasııa bergeni úshin Qazaqstan quramasynyń sapynda oınaı almaı júrmin», – dedi Damır Ryspaev. «Shynymdy aıtsam, bárine qol siltep, Soltústik Amerıkaǵa ketip qalý týraly oıladym. Biraq klýbta bul másele kóp uzamaı, jaqsy jaǵyna qaraı sheshilýi tıis ekendigin aıtty. Endigisin ýaqyt kórsete jatar. Eger dıskvalıfıkasııam alynbaıtyn bolsa, ketetinim anyq», – dedi hokkeıshi. Sonymen qatar, keshirimge ıe bolyp, burynǵy jattyqtyrýshysy Andreı Nazarov «Neftehımıkke» shaqyrar bolsa, ketip qalýy da múmkin eken. «Andreı Nazarovtyń qol astyna ketip qalýym da múmkin. Ekeýimiz skaıp arqyly baılanysyp turamyz. Biraq men úshin «Barys» birinshi orynda. Istiń bári meniń jaza merzimim týraly bolǵandyqtan, mundaı usynys túspedi», – dedi ol. Sońǵy oıyndarda «Barys» hokkeıshilerine jıi oıyn tártibi buzylyp júr. Máselen, Novokýzneskiniń «Metallýrgimen» ótken matchta Alekseı Vasılchenko astanalyqtardyń sapynan Brendon Bochenskıdiń basynan uryp qulatyp, jaraqattaǵan bolatyn. «Bul sátti kórdim. Árıne, Brendon úshin bári sátsiz aıaqtaldy. Biraq Alekseı Vasılchenkony óz basym bilgendikten, teris oımen jasady dep aıta almaımyn. Bul oıyn kezindegi jaǵdaı. Sport bolǵandyqtan jaraqatty aldyn ala bilý múmkin emes. Qazir áriptesim qatarǵa qosylyp, «Barysqa» kómegin tıgizedi dep oılaımyn», – dedi ol. «Komandanyń qazirgi jattyqtyrýshysy Edýard Zankovespen birneshe ret sóılestik. Oıyndar jaıly talqyladyq. Aldaǵy ýaqytta tóbeleske bet burmaı, bári ońynan bolsa, komandama septigimdi tıgizgim keledi», – dedi 21 jastaǵy tafgaıshy.