Golovkın kelesi jekpe-jegin Qazaqstanda ótkizetinin aıtty

Orta salmaqta WBA (Super), IBO, WBC jáne IBF belbeýleriniń ıegeri Gennadıı Golovkın (36-0, 33 KO) kelesi jekpe-jegin Qazaqstanda ótkizetinin málimdedi. «Rasymen, endigi aıqasymdy óz elimde ótkizsem deımin. Sebebi, ol jaqta da kásipqoı boksty kóz aldarynda kórgisi keledi. AQSh-ta bul joǵary klass bolyp eseptelse, Qazaqstan da osyǵan qosylýǵa nıetti. Boksty kórgisi keletinder kóp», – dedi Golovkın sońǵy baspasóz jıynynda. Osyǵan deıin GGG-diń EXPO-2017 kórmesi kezinde uıymdastyrylatyn boks keshinde sharshy alańǵa shyǵatyny habarlanǵan. Keıbir aqparat kózderi tipti, onyń 10 maýsymda ótetinin, al onyń qarsylasy orta salmaqtaǵy WBO belbeýiniń ıegeri Bıllı Djo Sonders (24-0, 12 KO) bolatynyn jazǵan. Brıtan boksshysy Golovkınniń osy senbide bolar jekpe-jegine arnaıy qatysady dep kútilýde. Qos boksshynyń Astanadaǵy kórmede jekpe-jekke shyǵý jóninde kelissózder júrgizgenmen, naqty sheshimge kelmegeni habarlanǵan. Sonymen qatar, Sonders óziniń mindetti qarsylasy grýzııalyq Avtandıla Hýrsıdzemen (32-2-2, 21 KO) judyryqtaspaý jóninde ortaq ymyraǵa kelgen bolatyn. Aıta keteıik, Golovkın 18 naýryzda Nıý-Iorktegi Madison Square Garden arenasynda WBA (Regular) belbeýiniń ıegeri amerıkalyq Denıel Djeıkobspen kúsh synasady. Bul keshti elimizde «Qazaqstan» jáne «KazSport» telearnalary 19 naýryzda 08:00-de tikeleı efırde kórsetedi.