Taıaýda Semeıde jańa avtobýstar el ıgiligine berildi. Oblys ákiminiń tapsyrmasyna sáıkes byltyrdan bastap qaladaǵy tasymaldaýshylar avtoparkterin jańartý jumysy júrgizilip jatyr. Sonyń aıasynda «AvtoTransSemeı», «Semavtopark» jaýapkershiligi shekteýli seriktestikteri Semeıde qurastyrylǵan zamanaýı 32 avtobýs satyp aldy.
«Jańa kólikter jolaýshylarǵa qolaıly ári qaýipsiz. Avtobýstyń syıymdylyǵy 100 adamǵa deıin, barlyq kólikte salqyndatý qurylǵysy ornatylǵan. Sonymen qatar qımyl-qozǵalysy shekteýli azamattarǵa yńǵaıly bolý maqsatynda avtobýstar retteletin otyrǵyzý alańymen, arnaıy apparelmen jabdyqtalǵan», delingen ákimdiktiń málimetinde.
Oblys ákimi Berik Ýálı óńirde qoǵamdyq kólik júıesin jańǵyrtý jumysy kezeń-kezeńimen jalǵasatynyn jetkizdi. «Avtobýstardyń barlyǵy zaman talabyna saı jabdyqtalǵan. Jolaýshylarǵa óte qolaıly. Bul baǵyttaǵy jumysty júıeli túrde jalǵastyramyz. Jolaýshy tasymaldaýshylarǵa ákimdik tarapynan tıisti qoldaý kórsetiledi», dedi óńir basshysy.
Ákimdiktiń málimetinshe, bıyl qalaǵa 70-ke jýyq jańa avtobýs satyp alý josparlanǵan. Qazir 46 avtobýs satyp alyndy. Onyń 14-i jyldyń basynda berilgen. Byltyr qoǵamdyq kólik parkin jańartý maqsatynda 62 avtobýs satyp alynǵan bolatyn. Qazir Semeıde 43 qalalyq marshrýtta 329 avtobýs jumys isteıdi. Qala turǵyndaryna 5 tasymaldaý-shy qyzmet kórsetip otyr. Alaıda bul osy saladaǵy jumys túbegeıli sheshildi degendi bildirmese kerek.
Bul iste jergilikti óndiristiń róli erekshe. 2025–2026 jyldardaǵy resmı habarlamalarda avtobýstardyń Semeıde qurastyrylǵany aıtyldy. Demek, másele tek daıyn kólik ákelýmen shektelmeıdi. Qalada kólik jańartý óndiris, jumys orny jáne ınfraqurylymdyq saıasatpen sabaqtasyp otyr. Osy turǵydan alǵanda, Semeıdegi avtobýs parkin jańartý kólik salasyndaǵy ǵana emes, jergilikti ekonomıkany qoldaıtyn qadamdardyń biri deýge bolar.
Rasynda, byltyrdan beri jolaýshylar kóligi máselesi kún tártibinen túsken joq. Qoǵam tarapynan atalǵan másele jıi kóterildi. Oblystyq ákimdik te avtoparktyń jańarýyna basymdyq berdi. Jańa avtobýstardy kóbeıtý, tasymaldaýshylarǵa qoldaý kórsetý, jańǵyrtýdy kezeń-kezeńimen jalǵastyrý sekildi ustanymdar resmı deńgeıde birneshe ret aıtyldy.
Bul salada ilkimdi jańalyqtar qala ishinde ǵana emes, oblys kóleminde de júrgizilip jatyr. Máselen, Aıagózde byltyr 10 jańa avtobýs berý kózdelgeni, alǵashqy legi jetkizilgeni, birneshe marshrýtqa shyǵarylǵany aıtyldy. Sonymen qatar áleýmettik ınfraqurylymǵa qajet kólikter de nazardan tys qalǵan joq.
Árıne, saladaǵy sheshimin kútken túıtkilder de az emes. Keıingi aılarda turǵyndar tarapynan qoǵamdyq kóliktiń júrý aralyǵynyń uzaqtyǵy, keı avtobýstyń aıaldamadan toqtamaı ótýi, dıspetcherlik jaýaptyń baıaýlyǵy jóninde shaǵym aıtyldy. Buǵan qosa, kólik júrgizýshilerdiń jalaqysy men olarǵa oryndy-orynsyz aıyppul salý, ony aılyqtan ustap qalý syndy máseleler jıi kóteriledi. Bul olqylyqtar da kezegi kelgende túzeler dep senemiz.
Endi bir ózekti másele, qaladaǵy 500-den asa aıaldamanyń edáýir bóliginiń jaǵdaıy aıanyshty, talapqa saı kele bermeıdi. Syry túsken, boıaýy ońǵan, ataýy óshken, kútimi kem, keı tusta tipti qos-qostan ornalasqan aıaldamalar da kezdesedi. Árıne, qoǵamdyq kólik jańaryp jatyr, biraq júıe tutas ózgerdi deýge erte. Avtobýstardyń jańarýy máseleniń bir jaǵy, al qyzmet sapasy, qozǵalys tártibi men aıaldama ınfraqurylymy qatar kórkeıýdi qajet etedi.
Abaı oblysy
