Premer-mınıstr Oljas Bektenov Memleket basshysynyń byltyr qarasha aıyndaǵy Vashıngtonǵa sapary elder arasyndaǵy ekonomıkalyq áriptestiktiń aýqymyn aıqyn kórsetkenin atap ótti. Jalpy somasy 17 mlrd dollar bolatyn qol qoıylǵan 29 kelisim ekonomıkalyq baılanystardyń keńeıýine eleýli serpin berdi. Qazaqstan Úkimeti qol jetkizilgen ýaǵdalastyqtardy júzege asyrýǵa basymdyq beredi.
«Qazaqstan-Amerıka yntymaqtastyǵy búginde qarqyndy damyp keledi. Onyń negizinde strategııalyq kózqarasy bizdiń birlesken jumysymyzǵa praktıkalyq sıpat beretin memleketterimizdiń kóshbasshylary arasyndaǵy berik qarym-qatynas jatyr. Biz joǵary saıası deńgeıdegi tyǵyz dıalog eki el arasyndaǵy saýda-ekonomıkalyq baılanys-tardy tereńdetý úshin odan ári qolaıly jaǵdaı týǵyzady dep senemiz», dedi O.Bektenov.
О́z kezeginde AQSh elshisi de ózara yntymaqtastyqtyń jańa deńgeıge kóterilgenin atap ótti.
«Bizdiń elder arasynda buryn-sońdy bolmaǵan qatynas qalyptasty. Qazaqstan Prezıdenti Qasym-Jomart Toqaev AQSh Prezıdenti Donald Tramptyń Beıbitshilik keńesi jáne Ibrahım kelisimderi jónindegi bastamasyna qatysty naqty ustanymyn bildirdi. Munyń barlyǵy da – tarıhı ári serpindi bastamalar. Qoldaý kórsetkeni úshin Amerıka Qurama Shtattary men Prezıdent Tramp Qazaqstanǵa alǵys bildiredi», dedi D.Stafft.
Byltyr eki el arasyndaǵy taýar aınalymy 3,19 mlrd dollarǵa jetti, al bıyl qańtar-aqpan aılarynda 487,4 mln dollardy qurady. Kezdesýde AQSh-tyń elimizdiń ekonomıkasyndaǵy negizgi strategııalyq ınvestorlardyń biri retindegi mańyzy atap ótildi. Qazir elimizde amerıkalyqtardyń qatysýymen 600-den astam kompanııa tabysty jumys istep jatyr. Otandyq naryqta «Chevron», «ExxonMobil», «Amazon», «Citi», «Wabtec», «John Deere», «Boeing», «Oracle», «PepsiCo», «Mars» sııaqty kompanııalardyń bolýy ekijaqty saýda-ekonomıkalyq yntymaqtastyqtyń joǵary áleýetin kórsetedi.
Kezdesý barysynda memlekettik basqarý júıesin odan ári reformalaý men jańartýǵa negiz bolǵan jańa Konstıtýsııanyń erejelerin júzege asyrýǵa da nazar aýdaryldy. Premer-mınıstr Oljas Bektenov Ata zańymyz saıası turaqtylyqty nyǵaıtyp, memleket pen qoǵamnyń údemeli damýy úshin berik negiz quratynyn aıtty.
Kezdesý qorytyndysynda taraptar saýda-ekonomıkalyq áriptestikti odan ári nyǵaıtýǵa, sondaı-aq basym baǵyttarda birlesken jobalardy júzege asyrýǵa beıildi ekenin rastady.
