Úshinshi kýrsta oqyp júrgen kezim. Qajyǵalı degen dosym boldy. «Seni Zeınolla Serikqalıev shaqyryp jatyr» deıdi bir kúni. «Ol kisini men tanymaımyn, nege shaqyrdy eken?» dep qoıamyn. Onda Zeınolla Serikqalıev «Juldyz» jýrnalynyń jaýapty hatshysy. Izdep bardym. Úshinshi kýrstyń stýdentine «Siz» dep sóıledi. «Sizdiń áńgimeńizdi «Lenınshil jastan» aldyq» dedi. Taldady. Maqtap otyr. Qazaq jazýshylarynyń jınaǵyna bergeli otyr eken. Osy kisi meni bireýmen shatastyryp otyrǵan joq pa dep betine qarap qoıamyn. Joq, men týraly aıtyp jatyr eken. «Sizdiń endi jazbaýǵa moraldyq haqyńyz joq», dedi sóziniń sońynda. Osylaısha, bir kúnde jazýshy bolyp shyǵa keldim. Kitap shyqty, besinshi kýrsta. Oqytýshylar qurmetpen qaraıtyn boldy. Biz oıladyq «shyn jazýshy bolǵan ekenbiz ǵoı» dep. Biraq, shyn máninde olaı emes…
* * *
Alǵashqy shyqqan táp-táýir shyǵarma seniń búkil jazýshylyq taǵdyryńdy anyqtaı almaıdy. О́z basyńdaǵy qýanysh-qaıǵyńdy jazǵannan keıin sen ózgelerdikin de dál ózińdikindeı etip jaza bilýiń kerek. Júregińnen ótkizip jazýyń kerek. Al oǵan ýaqyt qajet. Sol eki ortada adamda bir daǵdarys paıda bolady. Soǵan tóze bilýge tıistisiń. Joq, jurttyń bári jylda bir kitap shyǵarady ǵoı dep, soǵan kirisip ketseń, basqa jolǵa túsip ketesiń. Al álgi daǵdarysqa tózseń, sońynda báribir ózińdi tabasyń. Sosyn bári múlde ózgeshe bolady.
* * *
Eger shendilerdiń qazirgi talabyna salsań, Gogol men Chehovti gazet-jýrnaldar basa almas edi. Olar ómirdi, qoǵamdy synady ǵoı. Endi bir jazýshylar bar, olar ádebıetti kúnkóris qamyna aınaldyrǵysy keledi. Laýazymdy kisiler týraly roman jazady, poema jazady. Qysqasy, ádebıetti árkim ár túrli túsinedi. Shyndyqty jazý kerek deımiz. Biraq shyndyqtyń ózi ár túrli. Qarapaıym ǵana shyndyq bar, ashy shyndyq bar. Ashy shyndyqty jazý ońaı emes. Oǵan da azamattyq ustanym, batyldyq qajet.
* * *
Jurt qazir ortańqol jazýshy men myqty jazýshyny ajyrata almaı qaldy. Halyqtyń talǵamy sony ajyratatyndaı deńgeıge ósýi kerek dep oılaımyn. Búginde Keńes ókimetiniń soıylyn soqqandardy da jaqsy deımiz, Keńes ókimetine qarsy bolǵandardy da jaqsy deımiz. Sanamyzda qoıyrtpaq bar. Kez kelgen nársege syn kózben qaramasaq, batyl aıta almasaq, ol qoǵam áli de tómengi dárejede degendi bildiredi.
* * *
Meniń jazýshylyq kredom – aqıqattan asqaq eshteńe de joq.
Ázirlegen
Aıgúl SEIILOVA,
«Egemen Qazaqstan»
