Nátıjesinde «Atameken-Ordabasy» ındýstrıaldy parki qurylyp, kásipkerlerge birqatar tegin qyzmetter jıyntyǵy usynylady. Bul týraly oblys ákimi Janseıit Túımebaevtyń ındýstrıaldy parkke jasaǵan sapary barysynda belgili boldy.
Aımaq basshysy Keńes dáýirinen qalǵan ındýstrııalyq alpaýyttyń aýmaǵyndaǵy nysandar men ınfraqurylymdardyń jaqsy saqtalǵanyna toqtaldy. Desek te, zaýyttyń ózin qaıta iske qosý qıyn sharýa. Sondyqtan da, oblys basshylyǵy zaýyttyń aýmaǵynda birqatar jańa kásiporyndar qurý maqsatynda óndiris nysandaryn kásipkerlerge eki aıǵa tegin berý isin qolǵa alyp, jeńildetilgen baǵa saıasatyn usynbaq.
Ońtústik Qazaqstan oblystyq kásipkerler palatasynyń dırektory Asqar Ábýbakırovtiń málimdeýinshe, «Atameken-Ordabasy» ındýstrıaldy parki kásipkerlerge zańgerlik jáne býhgalterlik qyzmet kórsetip, olardy bıznes salasynda oqytýdy da qolǵa almaq. Sondaı-aq, atalmysh mekeme kásip ashqysy keletinderge aqparattyq jáne PR qoldaý kórsetip, jarnamalaý, qarjy kózin tartýǵa at salysý, bıznes-jospar jasaý syndy tegin qyzmetter jıyntyǵyn qosa usynyp otyr.
Qala syrtynda ornalasqan óndiris ornynda aýyl sharýashylyǵy men tamaq óndirisinen ózge barlyq salalar úshin qolaıly jaǵdaı jasalǵan. Onda taýarlarǵa arnalǵan qoıma da bar. Búginde parkte 5 joba iske asyrylyp jatyr. Oblys ákimi Janseıit Túımebaev tegin qyzmetter jıyntyǵyn túsindirý jumystaryn kúsheıtýdi tapsyrdy.
