Qaryz alý úshin de jaýapkershilik qajet

Keshe Senattyń jańa Tóraǵasy  pala­ta­nyń kezekti jalpy oty­ry­synda  sóı­le­gen sózinde aldaǵy mindet­terdiń mańyzyn ashyp kórsetti. Q.Mámı qos pa­la­taly Par­lament memlekettik bılik tarmaq­ta­rynyń biri retinde Qazaqstannyń ór­ken­deýine súbeli úles qosyp kele jat­qan­dyǵyn erekshe atady. – 2007 jylǵy konstıtýsııa­lyq reformaǵa sáıkes, joǵary zań shyǵarý organynyń ókilet­ti­ligi edáýir keńeıip, memlekettik basqarýdyń prezıdenttik-parlamenttik nysany anyqtalǵany belgili. Jaqynda Elbasy «Nur Otan» partııasynyń HIII sezinde memleketimizdiń saıası júıesi Parlament quzyretin keńeıtý ar­qyly odan ári jetildiriletinin aıt­ty. Bul – Parlamenttiń eki pa­latasyna da qatysty, – dedi Qaırat Ábdirazaquly. – Qazaq­stan halqyna Joldaýynda, ulyq­taý rásimindegi sózinde jáne 17 sáýirdegi Úkimettiń keńeıtil­gen otyrysynda Prezıdent  ult­tyq eko­nomıkanyń básekeles­tik­ke qabi­lettiligin arttyrý men ha­lyqtyń ál-aýqatyn kóterýge, bilim berý jáne densaýlyq saqtaý sa­lalaryn jetildirýge qatysty úl­ken maq­sat­tardy aıqyndap ber­di.  Sondyq­tan, depýtattyq kor­pýs bıliktiń barlyq deńgeıdegi atqarýshy jáne basqa da ókildi tarmaqtarymen ty­ǵyz yqpaldasa otyryp, Elbasy kórsetken aıqyndyqtarǵa erekshe nazar aýdarady dep senemin. Sonymen birge, Tóraǵa qazirgi ýaqytta ekonomıkanyń ındýs­trııa­­lyq-ınnovasııalyq damýy, sha­ǵyn jáne orta kásipkerlikti qoldaý kún tártibinde turǵan eń mańyzdy máseleler ekenin atap kórsetti. Áleýmettik sala da qa­shanda Parlamenttiń aıryqsha na­zarynda bolýy tıis. Quqyq­tyq-qorǵaý, sot júıesin odan ári damytý úrdisin jalǵastyrý – biz­diń negizgi maqsattarymyzdyń biri bolyp qa­la beredi, dedi ol. Kún tár­ti­bi­ne sáıkes depýtattar bir­qa­tar halyq­ara­lyq kelisimderdi qa­rap, ratı­fı­ka­sııa­lady. Atap aıtqanda, «Qa­zaqstan Respýb­lı­ka­synyń Úki­me­ti men Japonııa Úkimeti ara­syn­daǵy OAО́EY Kó­lik dálizin qaıta jańartý jo­ba­syn  (Jambyl ob­lysy) júzege asyrý úshin qa­ryz tartý týraly  notalar almasý nysanyndaǵy kelisimdi  ratıfıkasııalaý týraly» jáne «Japonııa Halyqaralyq yn­tymaq­tas­tyq agenttigi men Qa­zaqstan Respýblıkasynyń Úkime­ti  ara­syn­daǵy OAО́EY Kólik dá­lizin qaıta  jańartý jobasy (Jam­byl oblysy)  boıynsha Qa­ryz týraly kelisimdi  ratıfıkasııalaý týra­ly» zań jobalary qabyldan­dy. Sonymen qatar, osy maqsatta­ǵy «Qazaqstan Respýb­lı­kasy men Azııa Damý banki ara­syndaǵy Qa­ryz týraly kelisimdi (Jaı operasııalar) (OAО́EY 1 kólik dálizi [Jambyl oblysyn­daǵy ýchaskeler] [«Batys Eýropa – Batys Qytaı» halyqaralyq tranzıt dá­lizi] In­vestısııalyq baǵdarlama – 3-joba) ratıfıkasııalaý tý­ra­ly» zań jo­basy da qabyldandy. Qaralǵan úsh zań jobasy boı­ynsha Kólik jáne kommýnıkasııa mınıstriniń mindetin atqarýshy E.Dúısenbaev baıandama jasady. Onyń sózinen belgili bolǵandaı, Japonııa Halyqaralyq ynty­maq­tastyq agenttiginen alynatyn qar­jy somasy 6 mıllıard 361 mıl­lıon japon ıenin qurasa, qa­ryz 7 jyldyq jeńildikti qos­qanda 25 jyl ishinde ótelýi tıis eken jáne 1,7 paıyzdyq stavkamen jarty jylda bir ret tóleý kózdeledi. Al qazaqstandyq ta­rap­tyń qosa qarjylandyrýy 40 mıllıon dollar shamasynda.  Azııa Damý banki jaı kapıtal resýrstarynan elimizge 173 mıllıon AQSh dollary somasynda qaryz beretini belgili bolyp otyr. Qaryzdy óteý 4 jeńildik jylyn qosa alǵanda 19 jyldy quramaq. Paıyzdyq stavka árbir kezeńge eseptegende LIBOR+0,2 paıyzǵa teń. Komıssııa mindetteme úshin 0,15 paıyzdyq stavkamen alynady. Depýtattar óz sózderinde qaryzdy alýdaǵy jaýapkershilik týraly máseleni ótkir qoıdy. О́ıtkeni, alǵandy qaıtarý máselesi jan-jaqty pysyqtalýy qajet. Asqar TURAPBAIULY.