Árıne, týrızm salasy ózdiginen damı beretin sala emes. Oǵan qomaqty qarjy quıý jáne tehnologııalyq jetistikterdi endirý kerektigi túsinikti. Osy turǵydan kelgende, bul másele memleket-jekemenshik áriptestigi negizinde sheshýdi qajet etedi. Mysaly, Ońtústik Koreıada birqatar taý shańǵysy bazalary memleket qarjysyna salynyp, jekemenshikke berilgen. Olaı bolsa, koreıalyqtardyń bul úlgisi Qazaqstan jaǵdaıyna jarap jatyr. О́ıtkeni, elimizdegi kóptegen týrıstik operatorlardyń tabysy mardymsyz. Olardyń ózdiginen ınvestısııalyq jobalardy júzege asyrýǵa qaýqarsyz bolýy da sondyqtan. Jazy aptap ystyq, al qysy aıazdy keletin Qazaqstan jaǵdaıynda týrızmnen tabys tabý ońaı emes ekeni de belgili. Qysqy azyǵyn jazda jınap alatyn týrıstik operatorlar amalsyz óz qyzmetteriniń baǵasyn ósirýge májbúr. Qysta qarly boran joldardy jaýyp, aıaz betti qarıtynyn eskersek, kez kelgen adam osynda kelmes buryn tabıǵattyń qolaılylyǵyn zerttep alatyny taǵy ras.
Solaı desek te, bul salada aıtarlyqtaı ilgerileýshilikter bar. Sońǵy jyldary kóptegen qonaq úıler men meıramhanalar salynyp, qyzmet kórsetý sapasy aıtarlyqtaı artty. Elimizdiń eki basty qalasyna – Astanada EKSPO-2017 halyqaralyq kórmesin, al Almatyda qysqy Ýnıversıada ótkizý týrızm salasynyń damýyna ózindik serpin beredi dep kútilýde.
Qazirdiń ózinde birqatar halyqaralyq týrıstik operatorlar men basylymdardyń Ortalyq Azııany, sonyń ishinde Qazaqstandy tartymdy baǵyttardyń qataryna qosýy osyndaı ıgi isterdi eskergendikten dep aıtýǵa negiz bar. Atap aıtqanda, amerıkalyq The New York Times gazeti 2017 jyly barýǵa bolatyn álemdegi 52 eldiń tizimin jarııalady. Sonyń ishinde Qazaqstan 26-orynda kórsetiledi. Bul rette, EKSPO-2017 halyqaralyq kórmesiniń «Bolashaqtyń energııasy» ataýynyń da ózindik yqpalynyń bolýy ǵajap emes, onyń ústine IýNESKO-nyń Álemdik qundylyqtar tizimine elimizdiń birqatar nysandary kirip otyrǵany da tartymdy etkeni túsinikti. Munyń aldynda kanadalyq «G Adventures» týrıstik operatory Ortalyq Azııa óńirin tartymdy etip kórsetip, birinshi orynǵa shyǵarǵan-dy.
Qalaı bolǵanda da, elimiz týrızm salasyn damytý baǵytynda birqatar is-sharalardy júzege asyryp keledi. «Atameken» Ulttyq kásipkerler palatasy basqarmasy tóraǵasynyń orynbasary Gúlnár Qurbanbaeva sala týraly bylaı deıdi: «Týrızm – bul, eń aldymen, elimizdiń ımıdji. Biraq artyq rásimder, shyǵyndar atalǵan salany damytýǵa kedergi. Bul prosesti jedeldetý úshin qýatty básekelestik orta qurý kerek».
Suranys bolǵan jerde, árıne, básekelestik te júredi. Biraq ta, qyzmet kórsetý mádenıetiniń qalyptasýyna da memlekettik qadaǵalaý men qoldaý jetpeı jatqandyǵyn aıta ketken oryndy. Ásirese, jol boıy qyzmet kórsetý oryndarynyń sanıtarlyq talapqa saı emestigi talaı aıtylyp ta, jazylyp ta júr. Elimiz aýmaǵynyń keńdigin qaperge alsaq, jol boıyndaǵy qyzmet kórsetý oryndarynda sý tapshylyǵy men kógildir otyn-
nyń, ne bolmasa elektr qýatynyń jetpeı jatqandyǵy únemi seziledi. Týrızm salasynyń ınfraqurylymyn tolyq júzege asyrmaı, joǵary deńgeıli qyzmet kórsetý de múmkin emes.
Qoryta aıtqanda, elimizdiń týrızm salasyn damytý úshin, eń aldymen, osy salaǵa degen kózqarasty túbirimen ózgertken oryndy der edik. Shet elderde qymbatqa túsetin qyzyldy-jasyldy roýd-shoýlardy qansha kórsetseń de, týrıster arzan baǵa men sapaly qyzmet túrin tańdaıtynyn qaperden shyǵarmaǵan jón. Sondyqtan da týrıstik baǵyttardy tartymdy etýdiń tetikterin qarastyryp, ınfraqurylymdy jónge keltirgen abzal.
Asqar TURAPBAIULY, «Egemen Qazaqstan»
