Jambyl jerine qyrǵyz delegasııasyn Talas oblysynyń gýbernatory Daıyr Kenekeev ózi bastap keldi. Qurmetti qonaqtardy oblys ákimi Kárim Kókirekbaev qarsy alyp, bul jármeńke eki el arasyndaǵy yntymaqtastyqty odan ári arttyra túsetindigin aıtyp ótti. О́z kezeginde Talas oblysynyń gýbernatory Daıyr Kenekeev te Taraz qalasyndaǵy jármeńke óte joǵary deńgeıde uıymdastyrylǵanyn jetkizdi.
Jambyl oblysynyń Baızaq, Jambyl, Jýaly, Talas, Sarysý aýdandary jáne Taraz qalasy men Qyrǵyz Respýblıkasynyń Talas oblysy aýyl sharýashylyq taýar óndirýshileriniń qatysýymen ótkizilgen jármeńkede 200 tonnaǵa jýyq aýyl sharýashylyǵy taýary saýdalandy. Atap aıtqanda, Qyrǵyzstannan 100 tonnaǵa jýyq alma, kartop, fasol, pııaz, qyryqqabat, et jáne sút ónimderi, sonymen qatar jemis-jıdek kóshetteri jetkizildi. Al, Jambyl oblysynan et, sút, kondıterlik jáne makaron ónimderi, balyq taǵy da basqa aýyl sharýashylyǵy taýarlary ótkerildi.
Jalpy, jármeńkege usynylǵan taýar quny 65 mıllıon teńgeni qurady. Sondaı-aq, jármeńkede ónimder bazar narqynan 10-17 paıyzǵa arzan baǵaǵa saýdalandy. Jármeńke barysynda ortalyq alańda kıiz úıler tigilip, Qyrǵyzstan Respýblıkasynyń eńbek sińirgen ónerpazdary Jambyl jurtshylyǵyna óz ónerlerin pash etti.
Búginde Jambyl oblysy men Talas oblysynyń ózara yntymaqtastyǵy artyp keledi. Jyl basynda oblys ákimi Kárim Kókirekbaev bastaǵan jambyldyq delegasııa Talas oblysynda arnaıy bolyp, eki el arasyndaǵy ózara yntymaqtastyqty arttyrý boıynsha birqatar memorandýmdarǵa qol qoıǵan edi. Sondaı-aq, saýda-sattyq salasyndaǵy mańyzdy máselelerdi sheshý, azyq-túlik taýarlaryn eshbir kedergisiz Jambyl oblysynyń saýda núktelerine jetkizý jáne Áýlıeata óńirinde Qyrǵyz eliniń kásipkerleri men aýyl sharýashylyǵy ónimderin óndirýshilerdiń jármeńkelerin ótkizý jaıy da talqylanǵan bolatyn. Nátıjesinde Qyrǵyz Respýblıkasy Taraz jerine kelip, jármeńke ótkizip qaıtty.
Hamıt Esaman, «Egemen Qazaqstan»
Jambyl oblysy
