«Astanada 9 qyrkúıekte ótetin kásipqoı boks keshi «Saryarqa» velotreginde ótedi. Sport kesheniniń syıymdylyǵy 10 myń adam. Rıng aınalasyna 2-3 myń oryndyq qoıýǵa bolady. Bas-aıaǵy 13 myńǵa jýyq jankúıer keledi dep kútilýde. Jekpe-jek aldynda 3 baspasóz máslıhaty jáne ashyq jattyǵý ótedi. Jekpe-jek bitisimen, Saryarqa velotreginiń baspasóz zalynda boksshylardyń qatysýymen resmı baspasóz máslıhatyn jasaımyz. Eskerte ketetin bir jaıt "Almaty Arenada" ótken kásipqoı boks keshinde 15 myńǵa jýyq halyq kelip, bılet jetpeı kire almaı qalǵandary óte kóp boldy. Sol úshin bılet satylymǵa shyǵa salyp, tezirek alyp qoıýlaryńyzdy suranamyz. Bılet shamamen tamyz aıynyń 1 juldyzynda satylymǵa shyǵady. Bul joly da baǵalary qoljetimdi bolady. Aıta keteıik, kásipqoı boks keshiniń basty jekpe-jeginde jeńilmegen boksshy Qanat Islam judyryqtasady. Sondaı-aq, elimizdiń maqtanyshy, álem chempıony Beıbit Shúmenov te osy boks keshi aıasynda jekpe-jek ótkizedi dep kútilýde. Basqa da kásipqoı boksshylarmen kelissózder júrgizilýde», – dep jazdy Berik Sultan.
Aıta keteıik, Mádenıet jáne sport mınıstri Arystanbek Muxamedıuly boks keshiniń 9 qyrkúıekke belgilengenin aıtty. Biraq mınıstrliktiń baspasóz qyzmetiniń xabarlaǵanyndaı, bul aldyn ala merzimi. Jumys barysynda bul kún áli de ózgerýi múmkin.
Osyǵan deıin Qanat Islamnyń jattyǵýǵa kiriskeni habarlanǵan. Astanada ótetin boks keshine deıin ol bir ret sharshy alańǵa shyǵýdy josparlap otyr. Aldaǵy on kúnniń ishinde qarsylasy men ótetin orny jáne kúni belgili bolady.
Al Beıbit Shúmenov 29 sáýir kúni Las-Vegasta (AQSh) kýbalyq Iýnıer Dortıkospen kúsh synasady.
