Saqtandyrý naryǵynyń jaı-kúıi men bolashaǵy týraly QRUB Saqtandyrýdy qadaǵalaý departamentiniń dırektory Janat Qurmanov baıandama jasady. Ol elimizdiń saqtandyrý naryǵyndaǵy kúshterdiń sońǵy jyldarda qalaı ózgergenin aıta kelip, aktıvterdiń, menshikti kapıtaldyń jáne saqtandyrý rezervteriniń serpini boıynsha derekter keltirdi.
Qurmanovtyń aıtýynsha, 2017 jylǵy 1 qańtardaǵy jaǵdaı boıynsha Qazaqstan Respýblıkasynyń saqtandyrý sektorynda 32 saqtandyrý uıymy,15 saqtandyrý brokeri jáne 59 aktýarıı bar. Jıyntyq aktıvter men menshikti kapıtal tıisinshe 857 mlrd. teńgeni jáne 402 mlrd. teńgeni qurady.
«Aktıvter qurylymynda somasy 373 mlrd. teńge bolatyn baǵaly qaǵazdar quraıdy. Bul jalpy kórsetkishtiń 43%-y. Ekinshi deńgeıdegi bankterde ornalastyrylǵan salymdar jıyntyq aktıvterdiń 27% úlesin (228 mlrd. teńgeni) quraıdy», – dep habarlaǵan Qurmanov saqtandyrý rezervteri somasynyń ótken jylmen salystyrǵanda 9%-ǵa ulǵaıyp, 412 mlrd. teńge bolǵanyn málimdedi.
Tutastaı alǵanda, QRUB ókiliniń aıtýynsha, Qazaqstannyń saqtandyrý naryǵy 2016 jyly negizgi kórsetkishterdiń oń serpinin jalǵasady jáne saqtandyrý syıaqylary sońǵy 5 jyldaǵy maksımýmǵa kóterildi.
Saqtandyrý syıaqysynyń kólemi 2016 jylmen salystyrǵanda 24%-ǵa ulǵaıyp, 357 mlrd. teńge boldy.
«Saqtandyrý naryǵynda saqtandyrý sharttaryn jasasý jáne saqtandyrý oqıǵalaryn retteý kezinde kórsetiletin qyzmetter sapasynyń aıtarlyqtaı artýy, halyqqa arnalǵan erikti saqtandyrý ónimderi tizbesiniń keńeıýi, saqtandyrý qyzmetterin tikeleı satýdyń, onyń ishinde mindetti erikti saqtandyrýdyń saqtandyrý polısterin onlaın satýdyń damýy baıqalady. Saqtandyrý uıymdarynyń aqparattyq qyzmetiniń jandanýy azamattardyń qarjylyq saýattylyǵyn, saqtandyrý uıymdaryna jáne tutastaı alǵanda saqtandyrýǵa degen senimniń artýyna yqpal etedi», – dedi J. Qurmanov.
Onyń aıtýynsha, saqtandyrýdyń zańnamalyq bazasyn jetildirý, saqtandyrý naryǵynyń ınfraqurylymyn damytý, saqtandyrý uıymdarynyń qarjylyq ornyqtylyǵyn arttyrý boıynsha qabyldanǵan sharalar saqtandyrý qyzmetterin tutynýshylardyń quqyqtaryn jáne múddesin qorǵaýdy kúsheıtýge yqpal etti.
«Saqtandyrý sektoryn tıisinshe damytý jáne jumys isteýi maqsatynda saqtandyrý ombýdsmany, Saqtandyrý tólemderine kepildik berý qory, saqtandyrý jónindegi derekterdiń biryńǵaı saqtandyrý bazasy, aktýarııler qoǵamy sııaqty ınfraqurylymdyq uıymdar quryldy. Saqtandyrý syılyqaqylarynyń serpindi ósýine qaramastan, olardyń IJО́-degi úlesi tómen deńgeıde qalyp otyr. Bul Qazaqstannyń saqtandyrý naryǵy áleýetiniń zor ekendigin bildiredi», - dedi Qurmanov.
Qazaqstan ekonomıkasy men áleýmettik salasynyń zamanaýı damý satysy, jahandaný men álemdik júıege belsendi yqpaldasý prosesteri, DSU-ǵa kirý otandyq saqtandyrý ındýstrııasynyń aldyna jańa maqsattar men mindetter qoıady, olardy iske asyrý qarjy naryǵyn, onyń ishinde saqtandyrý naryǵyn damytý úshin jaǵdaılar jasaýdy talap etedi, dep qorytyndylady Ulttyq bank ókili.
