Sý tasqyny ahýalyna den qoıý josparlary ázirlenip, ózara is-qımyl josparlary bekitilgen. Halyqty evakýasııalaý jaǵdaıyna saı 1707 qabyldaý pýnkti daıyndalyp, qajetti kólikter shyǵarylǵan. Evakýasııalanatyn halyqtyń turmys-tirshiligin qamtamasyz etý úshin ákimdikter qajetti quraldardy daıarlap, azyq-túlik ónimderi men aýyz sý qoryn ázirlep qoıypty. Oǵan qosa, qazirgi kúnderi óńirlerde eldi mekender arasynda reıdter, sý tasqyny kezinde tıisti is-qımyldar qaǵıdalary bar jadynamalar taratyla otyryp, halyqpen túrli jıyndar belsendi túrde júrgizilip jatqan kórinedi.
Kóktemdegi qyzyl sýdyń kózi negizinen qys boıy túsken qardyń erýinen bolatyndyǵy belgili. Soǵan oraı eldi mekenderden 14 mln m3-den astam qar shyǵarylǵan. Sol sııaqty, muz keptelýiniń týyndaýynyń aldyn alý úshin Jabaı, Nura (Aqmola oblysy), Úbi (ShQO), Syrdarııa (Qyzylorda) ózenderinde jarý jumystary atqarylyp qoıylsa, Aqmola oblysynda sý tasqyny bolýy yqtımal ári bolyp qalsa qaýip tóndiretin Atbasar aýdanynda eldi mekenderdi qorǵaý boıynsha is-sharalar kesheni júrgizilgen.
Apat aıtyp kelmeıdi. Sondyqtan, ushaq arqyly baqylaý nátıjesinde jáne IIM Qazgıdromettiń derekteriniń, ótken jyldardaǵy sý basqan eldi mekenderdi qorǵaý boıynsha is-sharalardy júrgizý týraly málimetterdiń, sý qoımalarynyń tolýy týraly aqparattyń negizinde yqtımal sý tasqynyna aldyn ala boljam jasaldy. Soǵan sáıkes bıylǵy kóktemde sý tasqynynyń týyndaý qateri Aqmola, Qaraǵandy, Qostanaı, Qyzylorda, Soltústik Qazaqstan jáne Ońtústik Qazaqstan oblystarynda basymdaý ekeni anyqtalǵan. Eger alda-jalda jaǵdaı kúrdelense, onda Ishki ister mınıstrliginiń jalpy sany 12 myń adamnan turatyn toptary, 2 myńǵa jýyq tehnıka jáne 300 júzý quraly bar arnaıy kúshteri men qutqarýshylary saqadaı-saı daıyn.
Aleksandr TASBOLATOV, «Egemen Qazaqstan»
