Qorǵanys mınıstrligi baspasóz qyzmetiniń habarlaýynsha, mınıstrlik sharaǵa daıyndyqty bastap ta ketken. Vedomstvo basshysy, general-polkovnık Sáken Jasuzaqov kóshpeli jumys keńesin ótkizip, áskerı sherýdi uıymdastyrý jóninde naqty tapsyrmalar berdi.
Shırek ǵasyrlyq tarıhı dataǵa oraı ótetin sherýdiń ózindik erekshelikteri bar. Jumyldyrylǵan jeke quram men áskerı tehnıka sanynyń kóptigi boıynsha bul sherý buǵan deıingi sherýlerdiń barlyǵynan asyp túspek.
– Táýelsizdik alańynda shamamen 30 jaıaý paradtyq eseptop, ıaǵnı quramynda 5 myńnan astam áskerı qyzmetshi saltanatty marshpen adymdap ótedi. 300-ge tarta birlik áskerı tehnıka tartylady. Qazaqstandyq avıasııanyń kók aspandaǵy qýaty men jaýyngerlik ázirligin elimizdiń Áýe qorǵanysy kúshteriniń shamamen 80 birlik avıasııalyq tehnıkasy pash etedi. Bul rette, qazaqstandyqtar alǵash ret óz kózderimen 2016 jáne 2017 jyldary áskerimizdiń arsenalyn tolyqtyrǵan sý jańa áskerı tehnıkany, zamanaýı qarý-jaraq úlgilerin tamashalap, óz baǵalaryn bere alady, – dep habarlady Qorǵanys mınıstrliginiń baspasóz qyzmeti.
Paradtyń taǵy bir ereksheligi, oǵan Qazaqstan Qarýly Kúshteriniń ardagerleri, «Jas ulan» áskerı mektebiniń tárbıelenýshileri, aýmaqtyq qorǵanys brıgadasynyń rotasy, áskerı-patrıottyq klýbtardyń tárbıelenýshileri, Qorǵanys mınıstrligi áskerı-tehnıkalyq mektepteriniń shákirtteri qatysady. Atalǵan is-sharanyń negizgi túıini áli qupııa retinde saqtalýda.
Qarýly Kúshter basshylyǵy áskerı qyzmetshilerdi irikteý jáne tehnıkany daıyndaýdy bastap ketken. Bul sherý merekelik is-shara ǵana emes, tól áskerimizdiń qýatyn, Qarýly Kúshterdiń tehnıkalyq turǵyda jabdyqtalýyn, elimiz ben halqymyzdyń egemendigi men qaýipsizdigin kúzetip júrgen áskerı qyzmetshilerdiń jaýyngerlik ázirligi men jaýyngerlik qabiletin kórsetý bolyp tabylady. Buǵan deıin Uly Otan soǵysyndaǵy Jeńistiń 70 jyldyǵyna arnalǵan sherý de kópshiliktiń esinde.
2015 jylǵy ótken osy sharada UOS jyldaryndaǵy jáne qazirgi zamanǵy qazaqstandyq armııanyń áskerı tehnıkasynyń úlgileri halyq nazaryna usynylǵan bolatyn.
Arnur ASQAR, «Egemen Qazaqstan»
