Soǵan oraı, tótenshe jaǵdaılardyń aldyn alý sharalary da belsendilikpen júrgizilýde. Muny osy maqsatqa 900 mıllıon teńgeden astam qarjy qarastyrylǵanynan baıqaýǵa bolady. Atqarylǵan jumystar aýqymdy ári únemi baqylaýda ustalýda.
Senbi kúni oblys ákimi Málik Myrzalın, Ishki ister vıse-mınıstri Iýrıı Ilın jáne atalǵan mınıstrliktiń Tótenshe jaǵdaılar komıtetiniń tóraǵasy Vladımır Bekker jaǵdaıdy tikushaq arqyly baıqap shyqty. Shaǵalaly, Astana, Birsýat sý qoımalaryn tekseriske alǵan olar Atbasar aýdanynda keńes ótkizdi.
«Biz búgin sý tasqyny bolýy múmkin alty aýdan aımaǵyn áýeden baqylap shyqtyq, – dedi Aqmola oblysynyń ákimi M.Myrzalın. – Qardyń kóp túsýi jáne ylǵaldyń mol qorlanýy saldarynan Atbasar, Astrahan, Arshaly jáne Selınograd aýdandarynda kúrdeli jaǵdaı saqtalyp otyr. Tótenshe jaǵdaılarǵa daıyndyq jaman emes. Tabıǵı apattyń aldyn alý sharalary jazǵy-kóktemgi maýsymnan beri tııanaqty júrgizilip keledi. Oblystyń barlyq aımaqtarynda ınjenerlik jumystar kesheni atqaryldy. Al Atbasar qalasyndaǵy Jabaı ózeni jaǵalaýynda 9,5 shaqyrymdyq myqty bóget salyndy».
Sondaı-aq, 12 shaqyrymdyq kanal tazartylyp, 32 shaqyrymdyq aýmaqta jóndeý jumystary atqarylǵany, toǵandar nyǵaıtylyp, kúsheıtilgen 13 sýaǵar salynǵany málim boldy. О́zenderdiń qaýipti telimderinde muzdy jarý jumystary júrgizildi. Aldyn ala jumys josparyna sáıkes, 23,7 myń tonna ınertti materıaldar daıyndalyp, 102 myń danadan astam qap, 268,3 tonna janar-jaǵarmaı jáne 16,7 tonna azyq-túlik taýarlary daıyndalǵan. Eldi mekenderden 850 myń tekshe metr qar shyǵarylsa, jol boıy qyzmeti sýaǵarlar men kópirlerdi tazalaýdy aıaqtap keledi.
Yqtımal tabıǵı apatpen kúreske 2 588 adam, 1 220 dana tehnıka men 66 sýda júzý quraly jumyldyrylatyn bolady. Buǵan qosa, avarııalyq-qutqarý jumystaryn júrgizýge ishki ister organdary tarapynan 485 kisi, 103 tehnıka men 5 qaıyq qatystyrylmaq. Aımaqtaǵy gıdrobeketter táýlik boıy kezekshilik atqarady. Qajetti jaǵdaılar týyndaǵanda, qosymsha kúshter jumyldyrylyp, adamdardy, maldy kóshirý, ornalastyrý máseleleri tııanaqtalǵany aıtyldy.
Oblys basshysy bastaǵan top Atbasar qalasyndaǵy ózen boıyndaǵy jańa bóget qurylysynyń sapasyn tekserip, arnaıy tehnıkalardyń ázirligimen tanysty jáne jergilikti shtab múshelerimen, erikti kómekshiler quramymen áńgimelesti. Sondaı-aq, aýdan ákimi Andreı Nıkıshovtiń, oblystyq tótenshe jaǵdaılar departamentiniń basshysy Alekseı Sovetovtiń esebi tyńdaldy.
– Biz sý tasqynyna qatysty kúndelikti ǵaryshtyq monıtorıng jasaýdamyz, – dedi A.Sovetov. «Qazgıdromettiń» derekteri boıynsha oblysymyzdyń basym bóliginde qar jamylǵysynyń qalyńdyǵy byltyrǵy jylǵydan 1,2-1,6 ese joǵary. Atbasar óńirindegi anaǵurlym qaýipti sıpattaǵy Jabaı, Kolýton ózenderinde 5 sáýirden seń júre bastaıdy dep kútilýde. Barlyq aımaqta turǵyndardy shuǵyl túrde qonys aýdarýǵa múmkindik beretin 200 shtab qurylyp otyr. Sondaı-aq, Samarqan, Yntymaq, Sherýbaı, Shaǵalaly qoımalarynan sýdy bosatý jáne onyń qoryn qalyptastyrý máseleleri Sý resýrstary komıtetimen kelisilýde. Qazir óńirde 45 meteostansa, 37 gıdrobeket jáne 21 agrometeobeket jumys isteýde. Arnaıy reıdter kezinde aýyl turǵyndarymen kezdesýlerde jan-jaqty túsinik jumystary júrgizildi.
Memlekettik organdar tarapynan da kóktemgi sý tasqynyna qatysty máseleler qatań baqylaýda ustalyp otyrǵanyn aıtý qajet. Jýyrda Qazaqstan Prezıdentiniń Ákimshiligi Jalpy máseleler bóliminiń ınspektory Ǵalym Aýshárip bastaǵan top Arshaly aýdanyndaǵy «Bezymıannaıa» sý qoımasynyń jumysymen tanysyp, aýdan ákimi Azamat Taıjanovtyń habarlamasyn tyńdady.
Aýa raıyn boljaý stansasynyń habarlaýynsha, Aqmola oblysynda naýryz aıyndaǵy temperatýra qalypty deńgeıde bolǵan, al sáýirde aýanyń temperatýrasy kúndiz 16-17 gradýsqa kóterilmek. Iаǵnı, sáýirde syn saǵattary bastalmaq. Al máselelerdiń keshendi sıpatta sheshilip jatqandyǵy tótenshe jaǵdaılarǵa jol berilmeıtindigine senim qalyptastyrady.
Baqbergen AMALBEK,
jýrnalıst
Aqmola oblysy
