Qyzylorda oblysy boıynsha Kedendik baqylaý departamenti 2011 jyldyń 3 aıyn qorytyndylady. Syr boıyndaǵy kedenshiler úsh aıda el qazynasyna 3 mıllıard 970 mıllıon 284 myń teńge qarjy qosty. Rásimdelgen taýarlar úshin alynatyn tólemdermen qatar, sońǵy jyldary keden qyzmetiniń basym baǵyty – post kedendik baqylaý boıynsha oblystyń syrtqy ekonomıkalyq qyzmetpen aınalysatyn tulǵalarǵa qaıta baqylaý jasaýy da tıimdiligin kórsetip otyr. I toqsanda júrgizilgen tekserýler nátıjesinde 1 mıllıard 218 mıllıon 489 myń teńge bıýdjetke óndirilgen. Osy úsh aı ishinde departament 3 qylmystyq, 281 ákimshilik is qozǵaǵan. Sonyń arqasynda memleketke keltirilgen 332 mıllıon 563 myń teńge kólemindegi zalal qalpyna keltirilgen. Sonymen qatar, 15 mıllıon 914 myń teńge aıyppul salynyp, jergilikti bıýdjetke quıylǵan.
Erjan BAITILES. Qyzylorda.
* * *
3 706 000 000 Oblystyq máslıhattyń kezekten tys sessııasynda 2010-2013 jyldarǵa arnalǵan oblystyq bıýdjetke tolyqtyrýlar men ózgerister engizildi. Osyǵan baılanysty artylǵan qarjy kólemi 3 mıllıard 706 mıllıon teńgeni qurady. Osy qarjynyń basym bóligi, ıaǵnı 741,4 mln. teńgesi oblystyń bilim salasyna bólindi. Yrǵyz aýdanyna gaz ben sý qubyryn tartýdyń jobalyq-smetalyq qujattaryn daıyndaýǵa 89 mln. teńge, Qobda aýdanynyń eldi mekenderin qalpyna keltirýge 12,3 mln. teńge qaraldy. Oblys boıynsha salynatyn 13 medısınalyq pýnkt pen qaıta jaraqtandyrylatyn 9 nysannyń qurylysyna tıisinshe 185 mln. jáne 540,6 mln. teńge baǵyttaldy. Artylǵan qarjynyń qalǵan bóligi jergilikti joldardy jóndeýge, mádenıet, dene shynyqtyrý men sport salasyna, oblystyq ákimdik apparatyna, ishki ister departamentine, qala qurylysy men tabıǵatty qorǵaý sharalaryna bólindi.
Satybaldy SÁÝIRBAI. Aqtóbe oblysy.
* * *
2 600 000 000 Bıylǵy jyldyń 1 naýryzyndaǵy jaǵdaı boıynsha jergilikti bıýdjettiń kirisi osynshama teńgege artqan. Oblystyq máslıhattyń kezekten tys sessııasynyń kún tártibinde óńirdegi 2011-2013 jyldarǵa arnalǵan oblys bıýdjetine ózgerister men tolyqtyrýlar engizý jóninde másele qaraldy. Sonymen qatar, densaýlyq saqtaý mekemelerinde atqarylǵan sharalar jaıy da áńgimege arqaý boldy. Bekitilgen kiris kólemin 2 mlrd. teńgege arttyrýǵa oraı bıýdjet shyǵystaryna da ózgertý engizildi. Máselen, 16 qanatqaqty aýyldyq okrýgterdi ınternet-resýrstarmen qamtamasyz etýge, jóndeý jumystaryna jáne qorǵanys, bilim berý, densaýlyq saqtaý, áleýmettik qamsyzdandyrý, mádenıet, taǵy basqa salalarǵa baǵyttalǵan qarajat mólsheri aıqyndaldy. Sóıtip, bıylǵy jyldyń 1 naýryzyndaǵy jaǵdaı boıynsha jergilikti bıýdjettiń kiris mólsheri 2,6 mlrd. teńgege artqany anyqtaldy.
Kúmisjan BAIJAN. Almaty oblysy.
