Taldyqorǵandaǵy birinshi kezdesýde jerlesterimiz 4:1 esebimen basym túsken edi. Ol kezde de kórshilerimiz myqty qurammen kelgen. Arasynda Olımpııa oıyndarynyń júldegerleri boldy. Rıng ıeleri bul joly sol ketken eseni qaıtarýǵa tyrysty. Tipti, jekpe-jek aldynda Rıo-2016 Olımpıadasynyń chempıony Hasanboı Dýsmatov 5:0 esebimen utamyz dep suhbat ta berdi. Dýsmatovtyń bul pikirimen Anton Pınchýk qana kelisken joq. Qalǵany jappaı jeńildi.
Aldymen sharshy alańǵa 64 kılodaǵy boksshylar kóterildi. «Arlandardyń» namysyn Dilmurat Mıjıtov qorǵady. Ol О́zbekstanda turatyn etnıkalyq qazaq Elnur Ábdiraıymovpen jolyqty. 2015 jylǵy álem chempıonatynyń qola júldegeri bolyp sanalatyn Ábdiraıymov bizdiń Mıjıtovke esh múmkindik bermedi. Tóreshiler biraýyzdan Elnurdyń jeńisin moıyndady (45:50, 46:49, 47:48).
Ekinshi jupta (56 kıloǵa deıin) judyryqtasqan Ilııas Súleımenov te Abýlhaı Sharatovtan aılasyn asyra almady – 0:3 (47:48, 47:48, 45:50).
Al 75 kılodaǵy ózbek boksshysy Isroıl Madrımov bizdiń Saparbaı Aıdarovtyń osal tusyn taýyp, komandasyna úsh upaı syılady. Qorytyndy esep – 0:3 (45:50, 45:50, 46:49).
Qazaqstan komandasynyń jalǵyz jeńisi Anton Pınchýkke tıesili. Bıylǵy maýsymda úshinshi ret sharshy alańǵa shyǵyp otyrǵan Anton óz salmaǵyndaǵy reıtıngte kósh bastap tur. Bul joly ol Zýhrıddın Mahkamovty ońaı jeńdi. Qorytyndy esep – 3:0 (50:45, 50:45, 49:46).
Sońǵy bolyp sharshy alańǵa Rıo Olımpıadasynyń chempıony, Vel Barker kýbogynyń ıegeri Hasanboı Dýsmatov pen qazaq boksshysy Temirtas Júsipov kóterildi. Tóreshiler Dýsmatovtyń jeńisine esh kúmán keltirmedi. Sóıtip, 4:1 esebimen ózbek komandasy «Arlandardan» ese qaıtardy.
Bek TО́LEÝOV,
jýrnalıst
ASTANA
