Soǵystan kelgen soń sot salasynda jumys istep zeınetke shyqqan aqsaqaldy búgingi izbasarlary eshqashan umytqan emes.
Jaqynda oblystyq sottyń tóraǵasy Nurserik Sháripov Aıtjan aqsaqaldy ujymyna shaqyryp, kezdesý ótkizdi. Qan maıdandy Avstrııanyń Grask qalasynda aıaqtaǵan qarııanyń erlik isteri baıandaldy. Sot salasyndaǵy úzdik qyzmeti úshin Joǵarǵy sot tóraǵasy Qaırat Mámıdiń buıryǵymen berilgen «Minsiz qyzmeti úshin» medalin omyraýyna taqty.
– Uly Otan soǵysynda mıllıondaǵan jazyqsyz jandardyń ómiri qıyldy, – deıdi Nurserik Sháripov. – Aıtjan aǵamyz da jalyndy jastyq shaǵyn ólim qusqan qan maıdanda ótkizdi. Sondaı aýyr kezeńderdiń birinde Gıtlerdiń sýretin jarǵa tirep qoıyp atyp, «Gıtlerdi atqan qazaq» atanǵan eken. Munyń bári beıbit jandardy ajalǵa qıǵan fashızmge óshpendilikten, yzadan týǵan mezet qoı.
El basyna kún týǵan aýyr kezeńde úlken erlik kórsetken, beıbit ómirde de minsiz qyzmet jasaǵan Aıtjan qarııanyń ómiri kópke úlgi bolýy kerek. Sondyqtan, qazynaly qarııany ujymǵa arnaıy shaqyryp, aqyl-keńesin tyńdaımyz.
Osy jıynǵa arnaıy kelgen oblys ákiminiń orynbasary Ulasbek Sádibekov aımaq basshysynyń quttyqtaýyn jetkizse, oblystyq ardagerler keńesiniń tóraǵasy Jeńisbek Máýlenqulov otty jyldary omyraýyn oqqa tosqan maıdangerler, jeńisti jaqyndatqan tyń ardagerleri týraly estelik aıtty.
«Aýylyńda qartyń bolsa, jazyp qoıǵan hatpen teń» deıdi halyq danalyǵy. Júzge jaqyndap qalsa da Aıtjan qarııanyń jas býynǵa aıtary bar.
Baqtııar TAIJAN,
«Egemen Qazaqstan»
Ońtústik Qazaqstan oblysy
