Sýret: baq.kz/
Ishki jalpy ónimniń ósýi árdaıym halyq tabysynyń artýyna áser ete bermeıtini belgili. Sol sebepti aldaǵy ýaqytta ekonomıkalyq saıasattyń basymdyǵy jaı ǵana paıyzdyq ósimge emes, naqty tabys deńgeıine, jumyspen qamtýdyń sapasyna, satyp alý qabiletine oıysýy múmkin. Mundaı kózqaras azamattardyń ál-aýqatyn memlekettik basqarý júıesiniń negizgi ólshemine aınaldyrady.
Is júzinde bul qadam ınflıasııaǵa qarsy sharalardy kúsheıtýge ıtermeleıdi. Sebebi baǵanyń ósýi nomınaldy tabystyń ulǵaıýyn tez arada joqqa shyǵarady. Osyǵan baılanysty Úkimet pen Ulttyq banktiń baǵany turaqtandyrý jolyndaǵy is-qımyldaryn úılestirýi, naqty tetikterdi iske qosýy yqtımal. Ásirese kúndelikti tutyný naryǵyndaǵy baǵa qysymy joǵary segmentterge nazar aýdarta túsedi.
Ekonomıkalyq saıasattyń taǵy bir mańyzdy baǵyty – memleket tarapynan kórsetiletin qoldaýdyń áleýmettik-ekonomıkalyq qaıtarymyna qoıylatyn talaptardy kúsheıtý. Salyqtyq jeńildik pen sýbsıdııa alǵan kásiporyndar jalaqyny ósirý, jumys oryndaryn ashý men saqtaý, qyzmetkerlerdi oqytýǵa ınvestısııa salý tárizdi mindettemelerdi moınyna alýy múmkin. Mundaı tásil bıýdjetten beriletin yntalandyrý tek tabys pen aınalymdy kóbeıtip qoımaı, eńbek jaǵdaıyn jaqsartýǵa, qyzmetkerler kirisin arttyrýǵa qyzmet etýin kózdeıdi.
Naqty tabysty ósirý men jumyspen qamtýdy jaqsartýǵa baǵyttalǵan sharalardyń nátıjesi birden baıqalmaıdy. Bul – ýaqytty talap etetin úderis. Memleket halyq kirisin tikeleı kóbeıte almaıtynyn da eskergen jón. Naryq derbes jumys isteıdi, al bılik qurylymdarynyń mindeti – bıznesti damytýǵa qolaıly orta qalyptastyryp, tabystyń ósýine jol ashatyn yntalandyrý tetikterin usyný.
Erdilda TAÝTENOV,
«Ekonomıkalyq zertteýler ınstıtýty» AQ basqarma tóraǵasynyń orynbasary
