«Qazaqstandaǵy 100 jańa esim» jobasy arqyly zamandastar jetistigine nazar aýdarý kerek - Nazarbaev

Elbasynyń aıtýynsha, bul ıdeıany «Qazaqstandaǵy 100 jańa esim» jobasy arqyly iske asyrǵan jón.

"Elimizdiń Táýelsizdik jylnamasy jazyla bastaǵanyna nebári 25 jyl boldy. Bul – tarıh turǵysynan qas qaǵym sát desek te, elimiz úshin ǵasyrǵa bergisiz kezeń. Árıne, jasalǵan jumystardyń mańyzy men aýqymyna eshbir kúmán joq. Degenmen, osy qyrýar isti atqarǵan, el damýyna zor úles qosqan azamattardyń ózderi men olardyń tabysqa jetý tarıhy ádette qurǵaq faktiler men sıfrlardyń tasasynda qalyp qoıady. Shyn máninde, Qazaqstannyń árbir jetistiginiń artynda alýan túrli taǵdyrlar tur", dedi Prezıdent. 

«Qazaqstandaǵy 100 jańa esim» jobasy – Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarıhy. Jobada naqty adamdardyń naqty taǵdyrlary men ómirbaıandary arqyly búgingi, zamanaýı Qazaqstannyń kelbeti kórinis tappaq. 

"Biz «Janyńda júr jaqsy adam» degen sóz­diń baıybyna bara bermeımiz. Shyn máninde, Táýel­sizdik dáýirinde óziniń eńbegimen, bilimimen, óneri­men ozyp shyqqan qanshama zamandastarymyz bar. Olardyń júrip ótken joldary – kez kelgen statıstıkadan artyq kórsetkish. Sondyqtan, olardy televızııalyq derekti týyndylardyń keıipkerine aınaldyrýymyz kerek. Jastar ómirge shynaıy kózben qarap, óz taǵdyrlaryna ózderi ıelik ete alatyn azamattar bolýy úshin olarǵa úlgi usynýymyz kerek. Qazirgi medıamádenıetti sýyryla sóıleıtin «sheshender» emes, ómirdiń ózinen alynǵan shy­naıy oqıǵalar qalyptastyrady. Mundaı oqı­ǵalardy kórsetý buqaralyq aqparat qural­darynyń basty nysanasyna aınalýǵa tıis", dep jazdy Nursultan Nazarbaev. 

Sonymen qatar Prezıdent bul joba baǵyttalatyn úsh máseleni atady. Olar:

1. Aqylymen, qolymen, darynymen za­manaýı Qazaqstandy jasap jatqan naqty adam­dar­dy qoǵamǵa tanytý.

2. Olarǵa aqparattyq qoldaý jasap, tanymal etý­­diń jańa mýltımedıalyq alańyn qalyp­tas­tyrý. 

3. «100 jańa esim» jobasynyń óńirlik nusqasyn jasaý. El-jurt ultymyzdyń altyn qoryna enetin tulǵalardy bilýge tıis.                          

Materıaldy kóshirip basqanda Egemen.kz saıtyna gıpersilteme mindetti túrde qoıylýy tıis. Avtorlyq quqyqty saqtańyz!