Foto: Úkimet
Mınıstr elimiziń kómir ónerkásibi eldiń energetıkalyq qaýipsizdigi úshin mańyzdy ekenin atap ótti. Qazaqstan kómir keniniń qomaqty qoryna ıe jáne álemde 10-shy orynda tur, bul óndirýdiń qazirgi kólemimen alǵanda 300 jyldan astam ýaqytqa jetedi.
«Iri kómir ken oryndary Ortalyq Qazaqstannyń eki negizgi aımaǵynda ornalasqan. Olar – Qaraǵandy kómir basseıni men Torǵaı kómir basseınindegi Shubarkól jáne Jalyn ken oryndary. Soltústik-shyǵys aımaqta Ekibastuz kómir basseıni, Maıkúbi kómir basseıni, Qarajyra ken orny bar. Elimizdegi kómir qorynyń kólemi – 33,6 mlrd tonna», dedi Erlan Aqkenjenov.
Erlan Aqkenjenov qazir kómir salasyna jańa ınvestısııalar tartý boıynsha júıeli jumys júrgizilip jatqanyn da jetkizdi. Jumys baǵdarlamalaryna sáıkes 2025 jyly kómir ónerkásibindegi kelisimsharttarǵa salynǵan ınvestısııalar kólemi 305 mlrd teńgeni qurady, al 2026 jyly salaǵa tartylǵan ınvestısııa shamamen 553,5 mlrd teńge bolady dep boljanyp otyr. Sondaı-aq kómir ónerkásibinde 32 myńǵa jýyq adam jumyspen qamtylǵan. Sektordyń turaqty damýy barysynda jumys oryndarynyń sany óse túspek.
«Mınıstrlik kómir salasyndaǵy geologııalyq barlaýdy damytýǵa erekshe nazar aýdaryp otyr. Bıyl jyl sońyna deıin shamamen 10 ýchaske boıynsha kómir ken oryndaryna jer qoınaýyn paıdalaný quqyǵyn berý týraly aýksıon ótkizý josparlanyp otyr», dedi Erlan Aqkenjenov.
Paıdaly qazbalardyń 103 túri men 10 myńǵa jýyq ken orny memlekettik esepke alynǵan
