"Árbir halyqtyń, árbir órkenıettiń barshaǵa ortaq qasıetti jerleri bolady, ony sol halyqtyń árbir azamaty biledi. Bul – rýhanı dástúrdiń basty negizderiniń biri. Biz – ulan-ǵaıyr jeri men asa baı rýhanı tarıhy bar elmiz. Uly Dalanyń kóz jetkizgisiz keń-baıtaq aýmaǵy tarıhta túrli ról atqarǵan. Biraq, osynaý rýhanı geografııalyq beldeýdi meken etken halyqtyń tonnyń ishki baýyndaı baılanysy eshqashan úzilmegen. Biz tarıhymyzda osynaý kórkem, rýhanı, qasterli jerlerimizdiń birtutas jelisin buryn-sońdy jasaǵan emespiz. Másele elimizdegi eskertkishterdi, ǵımarattar men kóne qalalardy qalpyna keltirýde turǵan joq", dedi Elbasy.
Onyń aıtýynsha, ıdeıanyń túpki tórkini Ulytaý tórindegi jádigerler keshenin, Qoja Ahmet Iаsaýı mavzoleıin, Tarazdyń ejelgi eskertkishterin, Beket ata kesenesin, Altaıdaǵy kóne qorymdar men Jetisýdyń kıeli mekenderin jáne basqa da jerlerdi ózara sabaqtastyra otyryp, ult jadynda birtutas keshen retinde ornyqtyrýdy meńzeıdi.
"Munyń bári tutasa kelgende halqymyzdyń ulttyq biregeıliginiń myzǵymas negizin quraıdy. Biz jat ıdeologııalardyń áseri týraly aıtqanda, olardyń artynda basqa halyqtardyń belgili bir qundylyqtary men mádenı sımvoldary turǵanyn este ustaýymyz kerek. Tıisinshe, olarǵa ózimizdiń ulttyq qundylyqtarymyz arqyly ǵana tótep bere alamyz. Qazaqstannyń qasıetti jerleriniń mádenı-geografııalyq beldeýi – neshe ǵasyr ótse de bizdi kez kelgen rýhanı jutańdyqtan saqtap, aman alyp shyǵatyn sımvoldyq qalqanymyz ári ulttyq maqtanyshymyzdyń qaınar bulaǵy. Ol – ulttyq biregeılik negizderiniń basty elementteriniń biri. Sondyqtan, myńjyldyq tarıhymyzda biz alǵash ret osyndaı aýqymdy jobany jasap, júzege asyrýǵa tıispiz", dedi Nursultan Nazarbaev.
Osy máselelerdi aıta kele Prezıdent Úkimetke jurtshylyqpen aqyldasa otyryp, jobany ázirleýdi tapsyrdy. Onyń aıtýynsha, joba úsh negizgi máseleni qamtýy kerek. Naqtyraq aıtqanda:
1. Atalǵan «Mádenı-geografııalyq beldeýdiń» róli men oǵan enetin oryndar týraly árbir qazaqstandyq bilýi úshin oqý-aǵartý daıyndyǵyn júrgizý qajet;
2. BAQ osydan týyndaıtyn ulttyq aqparattyq jobalarmen júıeli túrde, myqtap aınalysýy kerek;
3. Ishki jáne syrtqy mádenı týrızm halqymyzdyń osy qasterli muralaryna súıenýge tıis.
