Búgingi kúni jergilikti bılik jáne tótenshe jaǵdaılar qyzmeti tarapynan jyldaǵy sý tasqyny kezderinde arnasynan asyp tógiletin Úlken Torańǵul kóli erekshe baqylaýǵa alynǵan. Ol asa qaýipti aıdyndardyń biri sanalady. Kóktemgi sý tasqyny kezinde bul mańaıda 20 myń gektarǵa jýyq aýmaq sý astynda qalatynyn eskersek, aýa raıynyń kúrt jylynýy túrli jaısyzdyqtarǵa soqtyrýy ábden yqtımal. Jaıshylyqta jylamsyrap aǵatyn Qamysaqty ózeni de osyndaı kezeńde buǵalyqqa boı bermegen asaý tarpańsha erekshe minez tanytatyny bar.
Byltyr sý deńgeıiniń kúrt kóterilýi saldarynan jaıylma sýlar 40-50 shaqyrym qashyqtyqtaǵy Aralaǵash, Rýblevka eldi mekenderine deıin jetip, tasjoldar shaıylyp ketken bolatyn. Bıyl da osyndaı yqtımal qaterdiń oryn alýy joqqa shyǵarylmaıdy. Tótenshe jaǵdaılar jónindegi departamenttiń mamandary qalyptasqan jaǵdaımen tanysyp, kólden shyǵatyn arnalar tereńdetilip, keńeıtildi. Sóıtip, sýdyń aǵý jyldamdyǵyn eki esege deıin arttyrý múmkin boldy.
Ýálıhanov aýdanynda ornalasqan Sileti ózeniniń bir ereksheligi arnalar men dambalardyń bolýynda. Muzdy jarý Qulykól men Karatal aýyldary arasynda sýdyń erkin aǵýyn qamtamasyz etedi. Osy sharaǵa erekshe ekpin túsirilip jatqany sondyqtan. Qutqarýshylardyń aıtýynsha, sý deńgeıi kún saıyn kóterilip keledi. Erekshe qaýip tóngen jaǵdaıda qos eldi meken turǵyndary birinshi kezekte kóshiriletin bolady. Maldardy jetkizý oryndary da belgilengen.
M.Jumabaev aýdanyndaǵy Beınásh aýylynda bóget nyǵaıtýǵa qosymsha kúshter jumyldyryldy. Mámlút kólindegi artyq sýdy Plotskoe kóline aǵyzý úshin «Petropavl – Qostanaı avtojoly arqyly aryq qazyldy. Bul sharalar oblystyq mańyzy bar Povozochnoe-Baıan-Arhangelka baǵytyndaǵy jol qatynasynyń saqtalýyn qamtamasyz etedi.
Tutastaı alǵanda, 170 eldi mekende 19 myń tekshe metr sý sorǵytylyp, sý tasqyny qaýpi birshama azaıtyldy.
О́mir ESQALI,
«Egemen Qazaqstan»
Soltústik Qazaqstan oblysy
