Otanymyzdyń eń mańyzdy meıramdarynyń birine arnalǵan merekelik sharaǵa oblys ákimi Janseıit Túımebaev qatysyp, barsha ońtústikqazaqstandyqtardy Birlik kúnimen quttyqtady.
«Halqymyzda «Baq qaıda barasyń − yntymaqqa baramyn» degen dana sóz bar. Eldik bolmysymyzǵa tán bul uǵymdy táýelsizdiktiń tuǵyrly, memlekettiń ǵumyrly bolýyna ózek ettik. Birlikti basty baılyǵymyz – Táýelsizdiktiń arqaýy etip aıshyqtadyq. Elbasymyz usynǵan jol, jurt bolyp jumyla ustanǵan saıasat shırek ǵasyrda jemisti nátıjesin berdi. Búgingi Qazaqstan birligi bekem, tirligi kelisken, yntymaǵy jarasqan elge aınaldy.Jetken jetistikterimiz ben alǵan asýlarymyz az emes. Búgin biz Uly dalanyń ulaǵatymen Máńgilik El qurýǵa qadam bastyq. Kún saıyn qubylǵan zamananyń ıirimine tótep beretin qýatty memleketti jasaqtaýdyń qamyna kiristik. Eleýli ózgerister qoǵamnyń barlyq salasyn qamtyp otyr. Jalpyulttyq jańǵyrý saıası-ekonomıkalyq salalarmen qatar, azamattyq sanaǵa da serpilis alyp kelmek», - dedi ákim
Saltanatty jıynda aımaq basshysy eldegi etnosaralyq tatýlyq pen qoǵamdyq-saıası turaqtylyqty saqtaýǵa súbeli úles qosqan óńirdegi 18 etnomádenı birlestikterge oblys ákiminiń «Baýyrmal» syılyǵyn tabystady.
Elimizdiń basty merekeleriniń birin toılaýǵa kelgen jurtshylyq «Aq kógershin» kompozısııasyn tamashalap, yntymaǵy jarasqan túrli etnos ókilderi ónerpazdarynyń ánin tyńdady. Munymen birge, jıylǵan jurtshylyq bir mezette 1 myń dombyrashynyń oryndaǵan kúıin tyńdasa, «Máńgilik el» obrazynda bezendirilgen mashına, Altyn adam kıimindegi 20 salt attylar sherýin kórdi.
Aıta keteıik, Ońtústik Qazaqstanda búgingi tańda 100-den astam etnos ókilderi tatý-tátti ómir súrip, birlese eńbek etip keledi. Al oblystaǵy 20 etnomádenı ortalyq pen aýdan, qalalardaǵy 51 fılıalda ár etnostyń salt-dástúrine, ádep-ǵurpyna, mádenıetine baılanysty túrli is-sharalardy ótkizýine barlyq múmkindikter jasalǵan.
Sonymen qatar, etnomádenı ortalyqtar janynda 17 jastar qanaty men 11 jeksenbilik mektebi bar.
