«Kóktemde ardagerler jasarady!»

Jeńis kúni qarsańynda Qazaqstan Respýblıkasy Prezıdentiniń Tuńǵysh qory osyndaı ataýmen Otan soǵysynyń ardagerlerine arnap, merekelik shara ótkizdi. Jyldaǵy dástúr boıynsha ótken qaýyshýǵa qart maıdangerler men Qormen yntymaqtasyp qyzmet atqaryp júrgen «Kazahstanskaıa pravda» gazeti atyndaǵy maıdan klýbynyń músheleri shaqyryldy. Merekelik kóńil-kúı UQK Ás­ke­rı ınstıtýtynyń úrmeli orkestri­niń oryndaýyndaǵy soǵysqa deıingi jáne soǵys jyldaryndaǵy áýen­der­diń úni estilgennen-aq bastalyp ketti. Estra­da ártisterimen birge ar­dagerler men qo­naqtar soǵys jyl­daryndaǵy súıik­t­i «Qarańǵy tún», «Katıýsha», «Kók oramal» án­de­rin shyrqady. Ánderdi tyńdaǵan saıyn jeńiske jetýge rýh bergen áýenmen soǵys umytylyp, mahabbat eske túskendeı, ardagerlerdiń jan­dary jadyrap sala bersin. Jıyndy ashqan Tuńǵysh Prezıdent qorynyń atqarýshy dırek­to­ry Bektas Muhamedjanov ardagerlerdi Uly Jeńis kúnimen qut­tyqtap, óz tilegin bildirdi. Onyń aıtýynsha, bıylǵy jyly Qor ardagerlerdiń 5 kitabyn jaryqqa shyǵarǵan. «Al­da­ǵy ýaqytta taǵy 5 kitapty shyǵa­rý­dy josparlap otyrmyz. Bizdiń qor muraǵatynda kezegin kútip jatqan kóptegen materıaldar bar», – dedi ol. Son­daı-aq, Jeńis kýágerlerine Uly Otan soǵysynyń ardagerlerine ar­nal­ǵan «Batyrlar portreti» atty kórme uı­ymdastyryp, merekelik dastarqan jaı­yldy. Ardagerler Je­ńis kúnine jetpegen bozdaq­tardy eske aldy, arnaıy daıyndalǵan soldat botqasynan aýyz tıdi. Shara barysynda Qazaqstan Res­pýb­lıkasy Tuńǵysh Prezıdenti qo­ry­nyń atynan soǵys ardagerlerine Da­rı­ǵa Nazarbaevanyń «Eger soǵys bol­ma­ǵan­da» konsertiniń DVD-dıs­kileri tap­sy­rylyp, syılyqtar men gúlder syı­lan­dy. Atalmysh qor Otan soǵysynyń ardagerlerine ar­nal­ǵan qaıyrymdy­lyq sharalaryn odan ári jalǵastyrýda. Aldaǵy kúnderi eli­mizdiń iri bes qalasynda klassıkalyq mýzykadan qaıyrymdylyq konsertin ótkizbek. Gúlzeınep SÁDIRQYZY. Almaty.