Bul kórmege shyǵarmalary álemniń 20 tiline aýdarylyp, 7,7 mıllıon taralymmen oqylyp kele jatqan kórkemsóz sheberiniń 130 eńbegi qoıylǵan. Oqyrmandardyń nazaryna usynylyp otyrǵan osynaý kitap kórmesi úsh bólimnen turady.
«Adam óz taǵdyrynyń ustazy» bólimi avtordyń ómirbaıany, ósken ortasy jaıynda maǵlumattar beretin eńbekter men fotosýretterge arnalsa, alǵash shyqqan eńbekterinen tartyp, búgingi kúnge deıingi shyǵarmalary men álem halyqtary tiline aýdarylǵan kitaptary «Jazýshylyq – qanǵa sińgen minez, saǵynysh pen muń egiz» bólimine toptastyrylǵan. «Qalamgerdi qatary ósiredi» atty sońǵy bólimge shyǵarmashylyq ósý joly men eńbekteri jaıly jazylǵan monografııalar qoıylǵan.
14 jasynan bastap tiri sózben sýret salýdy serik etken avtordyń qalamynan 11 roman, 22 hıkaıat, 100-ge tarta áńgime týǵan. Zertteýshiler D.Dosjan shyǵarmashylyǵyn úsh salaǵa bólip qarastyrady. Birinshiden, kóne ǵasyr qoınaýynan er túrik rýhyn tiriltken 60 jyldar basyndaǵy tarıhı taqyryptary. Oǵan dálel – «Jibek joly», «Otyrar», «Farabı» atty kitaptary. Ekinshi: bodandyq buǵaý men sheneýnikter sharpysýynan ulttyq rýhyn joǵaltyp, minez ekologııasyna ushyraǵan urpaqtar obrazynyń galereıasy – «Zaýal», «Darııa», «Tabaldyryǵyńa tabyn», «Jolbarystyń súrleýi», «Kisi aqysy» kitabynan tabylady. Sońǵysyna ǵajaıyp tulǵalar ǵumyryn kórkemsózben sóıletken «Muhtar joly», «Abaıdyń rýhy» romandary enedi. «Aq Orda» romany, «Astananyń bas arhıtektory» derekti hıkaıasy táýelsizdiktiń tarıhyn kórkem kestelese, qalamgerdiń keıingi kezderi jazǵan «Keshirim», «Adam aına», «Aleksandrııa kitaphanasy» áńgimeleri men «Janyp-sóný», «Qyzyl kenish oqıǵasy», «Jan tátti» hıkaıattary adam taǵdyryn ár qyrynan sýrettegen.
Jalpy, D.Dosjan XXI ǵasyr – naryq zamanynyń keıipkerlerin somdap júrgen birden-bir jazýshy. Jıynda sóz sóılegen Á.Kekilbaev oǵan «Sózdiń túbin qazyp jazatyn qazbager jazýshy» dep baǵa berse, S.Orazalın qalamdas jazýshynyń shyǵarmashylyǵy men adamı qasıetterine toqtaldy. Arqaǵa astanamyz alǵash kóship kelgende qazaq 11% ǵana edi, al búginde qazaqtyń sany 77%-ǵa jetti. Astanada 101 jazýshy bar eken. Qazaqy ádep, ulttyq psıhologııa qalyptasty. Elorda rýhanı ortalyqqa aınalyp kele jatyr, osyǵan táýbe deımin, degen QR Prezıdenttik mádenıet ortalyǵynyń dırektory, ǵalym Myrzataı Joldasbekov odan ári óndirte jazyp júrgen jazýshyǵa shyǵarmashylyq tabys tiledi.
Maıgúl SULTAN,
L.N.Gýmılev atyndaǵy EUÝ stýdenti
