«Dúnıege keler áli talaı Qasym»

San túrli mádenı shara­lar­dyń uıtqysy bolyp júrgen Prezıdenttik mádenıet ortaly­ǵyn­da Mádenıet mınıstrliginiń uıymdastyrýymen Qasym Aman­jolovtyń 100 jyldyq me­reı­toıyna arnalǵan «Dúnıege keler áli talaı Qasym » atty áde­bı-sazdy kesh bolyp ótti. Ony ortalyq dırektory Myrzataı Joldasbekov júrgizip otyrdy. Daýylpaz aqyn toıyna ar­nal­ǵan keshti ashqan Mádenıet mınıstri Muhtar Qul-Muham­med Prezıdenttik mádenıet or­ta­lyǵy búginde shyn máninde qa­zaq rýhanııatynyń altyn uıa­syna aınalǵanyn, dál osy jerde ótken Shoqan Ýálıhanovtyń, Baýyrjan Momyshulynyń, Kenen atamyzdyń mereıtoılary, endi mine, HH ǵasyrdyń uly aqyny Qasym aǵamyzdyń 100 jyldyq torqaly toıyna ulasyp otyrǵanyn aıta kele, «HH ǵasyr­dyń basynda Maǵjan salǵan jańa dástúrdi ǵasyr ortasynda qaıta jańǵyrtqan – Qasym Amanjolov. Ol kózi tirisinde de, odan keıin de ómirden qaǵajý kórse de, ónerden qaǵajý kórmeı, qazaq ádebıeti tórinen oıyp turyp oryn alǵan adam. Qasym poezııasy ózinen keıingi tutas bir aqyndar shoǵyryn dúnıege ákeldi. Sol úlken áserdiń arqasynda Muqaǵalı bastaǵan uly aqyndar ósip shyqty», – dedi. Son­daı-aq ol Qasymnyń Uly Otan soǵysynda jazǵan otty jyr­lary keshegi Aqtamberdi, Qaz­týǵan, Mahambetterden beri tartatyn pat­rıottyq poezııany buryn-sońdy bolmaǵan bıikke kótergenin, tipti orys poezııa­sy­nyń ozyq úlgi­lerinen asyp tús­kenin de nazardan tys qal­dyrmady. Keshte aqyn óleńderine ja­zyl­ǵan aıtýly ánder men ol tý­raly estelikterden kóri­nister oryndaldy. Qasymnyń súıgen jary Sápen (Saqyp­jamal) apaı­dyń esteligin Qazaqstannyń ha­lyq ártisi Gúl­jan Áspetova naqyshyna keltire oryndap, jıylǵan jurt júregin bir terbetse, Qazaqstannyń eńbek sińirgen ártisi Meıirhan Adambekov «Aq sáýle» ánin domby­raǵa qosylyp tebirene shyr­qa­dy. Sondaı-aq belgili kúıshi-saz­ger Seken Turysbekov Súgir­diń «Qosbasar» kúıin qos ishekte kúmbirletti. Ádemi áýen men sulý sazdy ańsap kelgen elorda jurty men qonaqtaryn ózindik daýysymen tánti etken áıgili ánshi Sara Tynyshtyǵulovanyń oryn­daýyn­daǵy aqynnyń «Jyr jazamyn júregimmen» shyǵarmasy erekshe kóńil-kúıge bóledi. Bolashaǵynan mol úmit kúttiretin balǵyn aqyn Jambyl Dúısenovtiń «Qasymǵa arnaý» óleńi eshkimdi de beıjaı qaldyrmady. Eı, tákappar dúnıe, Maǵan da bir qarashy. Tanısyń ba sen meni, Men qazaqtyń balasy! – dep dúnıege syımaı ketken týma darynnyń toıy aldaǵy ýaqytta óz jalǵasyn elimizdiń ózge óńirlerinde de taba bermek. Ábdirahman QYDYRBEK. Sýretterdi túsirgen Orynbaı BALMURAT.