Aýǵanstanda oqqaǵarlardyń biri el prezıdentiniń týǵan inisi Ahmad Valı Karzaıdy atyp óltirdi.
BaltInfo agenttiginiń habarlaýynsha, Hamıd Karzaıdyń inisi Kandagardyń provınsııalyq keńesiniń basshysy qyzmetin atqarǵan, sol sııaqty ol eldegi eń yqpaldy ári baı adamdardyń biri bolǵan. Qylmys Valı Karzaıdyń úıinde jasalypty. Prezıdenttiń inisin Hamıd Karzaıdyń burynǵy oqqaǵary Sardar Mohammed óltirgen kórinedi. Qaskúnemdi kúzetshiler sol jerde tabanda atyp tastaǵan. Oqıǵa oryn alǵan sátte úıde qonaqtar bolǵan eken. Memleket basshysynyń ákimshiligi qylmysty tergeýdi bastaý jóninde ókim berip otyr.
AQSh Sırııa basshysyn moıyndamaı otyr
AQSh ókimeti budan bylaı Sırııa prezıdenti Bashar Asadty zańdy dep sanamaıdy, sondyqtan Vashıngton onyń bılikte qalýyna múddeli emes.
Sarapshylar mundaı áreket Damaskige Batys tarapynan burynǵydan da qatal sanksııalar týǵyzady, dep esepteıdi. Prezıdent Asad máńgilik emes, biz onyń bılikte qala berýine múddeli emespiz, bizdiń maqsatymyz Sırııa halqynyń demokratııaǵa degen umtylysyn kórý, al el prezıdenti Asad óz zańdylyǵyn joıdy, ol óz ýádelerin oryndaı alǵan joq, onyń syrtynda ol óz halqyn basyp, tunshyqtyrý úshin Irannan kómek aldy, dep málimdegen AQSh-tyń memlekettik hatshysy Hılları Klınton. Mundaı qatqyl málimdeme jasaýǵa Damaskidegi AQSh elshiligi janynda uıymdastyrylǵan buqaralyq sherýler sebepker bolyp otyrǵan syńaıly.
Terrorshylar gaz qubyryn jaryp jiberdi
Belgisiz bireýler keshe Sınaı aralynyń soltústigindegi gaz qubyrynyń taratýshy stansasyn jaryp jibergen.
Bul Izraılge Egıpetten otyn jetkiziletin gaz qubyryna jasalyp otyrǵan tórtinshi shabýyl eken. Kýágerlerdiń aıtýlarynsha, belgisiz adamdar kúzetshige shabýyl jasap, sońynan Al-Arısh qalasyna taıaý mańda ornalasqan stansany jaryp jibergen kórinedi. Jarylystan paıda bolǵan jalyn 20 shaqyrym qashyqtyqqa deıin kórinip turǵan. Soltústik Sınaıdyń gýbernatory men qaýipsizdik qyzmetiniń basshysy oqıǵa bolǵan jerge kelip jetken, al qaýipsizdik qyzmetiniń qyzmetkerleri bolsa, qaskóılerdi izdestirýde. 5 aqpan men 27 sáýirde bolǵan jarylystardan keıin stansany birneshe aptaǵa jabýǵa týra kelgen bolatyn.
Fransııa óz áskerlerin shyǵarmaq
2012 jyldyń sońyna taman 1000-nan astam fransýz áskerıleri Aýǵanstannan ketpek.
Vashıngtonnyń qol silteýinen keıin NATO koalısııasynyń ózge músheleri de áskerlerin shyǵarý turǵysyndaǵy ábigerge túse bastady. Fransııa prezıdenti Nıkolıa Sarkozı Sarobı áskerı bazasynda sóılegen sózinde aldaǵy jyldyń sońyna qaraı 4 myń soldat pen ofıserlerden turatyn fransýz kontıngentiniń tórtten biriniń Aýǵanstannan ketetinin málimdedi. Olar soǵys bastalǵan 2001 jyldan beri Aýǵanstanda Kabýl qalasy ornalasqan Kapısý provınsııasyna baqylaý ornatý isimen aınalysyp keledi. Osy jyldar ishinde fransýzdyń 64 áskerı qyzmetshisi, onyń 9-y bıylǵy jyly qaza tapqan. Fransııa prezıdenti áskerlerdi shyǵarý jóninde aıtyp turyp oıyn «soǵysty aıaqtaý kerek» degen sózben túıindegen kórinedi.
Isti qaraý keıinge qaldyryldy
Stross-Kan qonaq úı qyzmetshisin zorlady degen ózine taǵylǵan aıypqa qatysty iste jeńip shyǵady degen sózder sońǵy ýaqyttary jıi qaıtalanýda.
Degenmen, zardap shekken taǵy bir qyz tabylyp otyrǵan syńaıly. Qazir tergeý jumystary júrýde. Halyqaralyq valıýta qorynyń burynǵy basshysyna qatysty daýly isti qaraý keıinge qaldyryldy. Ol jóninde keshe Nıý-Iork prokýratýrasy málimdegen. Osylaısha 18 shildede ótýge tıis tyńdaý 2011 jyldyń 1 tamyzyna shegerilip otyr. Munyń ózi is tez aıaqtalady jáne Stross-Kan jeńip shyǵady degen sózdiń órshı túsýine sebepker bolǵan syńaıly. Búginde meni zorlady dep aryz bergen 32 jastaǵy gvıneıalyq emıgrant áıeldiń Amerıkadan baspana izdeı júrip osyǵan deıin de talaı ótirik aıtqandyǵy, salyqtan jaltarǵandyǵy belgili bolyp otyr.
Prezıdent saılaýyna daıyndyq bastaldy
Túrkimenstan prezıdenti Gýrbangýly Berdymýhamedov 2012 jyly ótetin prezıdent saılaýyna daıyndyqty bastaý jóninde habarlaǵan.
Mınıstrlikter men salalyq vedomstvolardyń, qoǵamdyq uıymdardyń, eldiń barlyq azamattarynyń mindeti prezıdenttik saılaýǵa tyńǵylyqty daıyndalyp, ony joǵary deńgeıde, ashyqtyq pen jarııalylyq jaǵdaıynda ótkizý, onyń ózi nyǵaıyp kele jatqan demokratııanyń aıǵaǵy bolyp tabylýǵa tıis, dep atap kórsetken prezıdent taıaýdaǵy úkimet otyrysynda. Memleket basshysy tuńǵysh ret oppozısııa týraly da óz oıyn ashyq aıtqan. Biz ózderin oppozısııadanbyz deıtin toptarmen qyzmettes bolýdan qoryqpaımyz, eger opponentterdiń biri aldaǵy prezıdent saılaýyna qatyspaq nıette bolsa, onyń elge emin-erkin kelýine bolady, dep atap kórsetken.
Maradona avtobýspen soqtyǵysty
Belgili fýtbolshy Dıego Maradona qashanda bir oqys oqıǵalarǵa tap bolady da júredi.
Birde ony esirtki qoldanǵan jerinen ustap alsa, endi birde onyń mahabbat qumarlyǵyn uıymdastyryp júrgeni belgili bolyp qalady. Onyń paparassılerge qarsy qolyna qarý ustap shyqqan kezi de bolǵan. Al ótken jyly eńkeıip súıip alamyn degen kezde fýtbol korolin óziniń ıti betinen tistep alǵan bolatyn. Osy joly ol ózi rólde otyryp jol-kólik oqıǵasyna tap bolypty. «Honda» avtomashınasynyń rólinde kele jatqan Dıego avtobýsqa baryp soqtyǵysypty. Maradona aıaǵyn zaqymdap alsa, onyń azamattyq nekedegi qurbysy Veronıka jeńil jaraqat alǵan kórinedi.
Internet materıaldary negizinde ázirlendi.
