41-diń qaharly kúzi

Qazaqstannyń Reseıdegi el­shi­liginiń qoldaýymen Máskeý­degi Ulttar úıinde tarıh ǵy­lym­darynyń doktorlary, professorlar Vladıslav Grıgorev (Máskeý) pen Láıla Ahmetova (Almaty) jazǵan «Iаrostnyı 1941. Razmyshlenııa ıstorıkov» dep atalatyn kitaptyń tanys­tyrylymy bolyp ótti. Ol Uly Otan soǵysynyń bastalǵanyna 70 jyl tolýyna oraı uıym­das­tyrylǵan dóńgelek ústel ta­qy­rybymen úndesip, kópshiliktiń yqy­lasyn týdyrdy. Kitaptyń qun­dy sıpatyn negizinen buǵan deıin Reseı, Qazaqstan, Germanııa elderi muraǵattarynda saq­ta­lyp kelgen, taıaý merzimde ashylǵan materıaldardyń – ás­kerı-memýarlyq ádebıetterdiń, keńestik jáne nemis áskerleri komandırleri kúndelikteriniń, soǵysqa qatysýshylardyń estelikteri men oı-tolǵamdarynyń jınaqtalyp, taldana usynyl­ǵan­dyǵymen bildirýge bolady. Avtorlar kitap týraly jal­py maǵlumat bere kelip, taqy­ryp­qa kelý, materıaldar jınaq­taý, ha­lyqtyń qaharmandyǵyn kórsetý baǵytyndaǵy shyǵarma­shy­lyq áre­ketteri týraly keńi­nen baıan­dady. Kitapta 1941 jyl­­ǵy shaıqastar­ǵa, sonyń ishin­­de Brest qamalyn qorǵaýǵa qatys­qan qazaqstandyq­tardyń tizimi alǵash ret berilgen. Sondaı-aq Qazaqstanda jasaq­tal­ǵan ataqty 8-gvardııalyq dıvızııa týraly jan-jaqty jazyl­ǵan. Kitapta osy taqyrypqa tikeleı qatysty adam attary, sıfr­lar, ataýlar jáne basqa naqty materıaldar kóptep kezdesedi. 1941 jylǵy oqıǵalardy ádil tarazylaı otyryp, avtor­lar soǵysýshy taraptardyń ás­kerı jaı-kúıine, soǵys qarsa­ńyn­daǵy kadr saıasaty másele­sine, jekelegen áskerı memlekettik qaıratkerler róline toq­talyp, tutastaı kezeńniń qu­jat­­tyq shyndyǵyn ashýǵa ty­ry­­sady. Dóńgelek ústel bary­synda qatysýshylar sondaı-aq bul eńbektiń taldamaly ári salystyrmaly turǵyda ja­zyl­ǵanyna mán bere kelip, onyń oqý quraly úlgisinde jaryq kórýi qalyń oqyrmandy, ási­rese, Qazaqstan men Reseıdiń oqýshy jastaryn qaharly qy­ryq birinshi jyldyń shynaıy oqıǵalarymen tereńirek tanys­tyrýǵa yqpal etetinine basa nazar aýdardy. Serikqalı BAIMENShE, «Egemen Qazaqstan» – Máskeýden.