«Tartysqa daıynbyz!» – deıdi Rýdnyı qalasyndaǵy «Gornıak» komandasynyń bas bapkeri Sergeı MOGILNIKOV

Búginde jurtshylyqqa sporttyń artyq­shylyǵyn aıtyp jatýdyń ózi artyq. Jyl saıyn bizdiń elimizde de sport kúni keńinen atalyp ótedi. Bıyl Rýdnyı qalasyndaǵy «Gornıak» komandasynyń hokkeıshileri osy tól merekesin jol ústinde atap ótti. Byltyr kenshiler ko­mandasy on jyldyń ishinde birinshi ret Qazaqstan kýbogyn qan­jyǵalap qaıtqan edi. Rýdnyılyqtardyń bıylǵy daıyndyǵy da jaman emes. Biz hokkeıshiler sapary aldynda komandanyń bas bapkeri Sergeı Mogılnıkovpen áńgimelesken edik. – 2010 jylǵy kýbok jeńim­pazynyń bıylǵy shabysy qalaı bolmaq? – Hokkeıden Qazaqstan kýbogy – mańyzdy týrnırlerdiń biri. Meniń oıymsha, qazir barlyq ko­mandalardyń daıyndyq deńgeıi birdeı. Jerebe boıynsha, biz qa­raǵandylyq «Saryarqa», kókshe­taý­lyq «Arlan», óskemendik «Kaz­sınk-Torpedo-2» jáne bıyl qu­rylǵan jańa «Astana» koman­da­larymen bir toptamyz. Jarysta byltyrǵy jeńistiń kezdeısoq emestigin bul joly da dáleldeýge umtylamyz. Qysqasy, alyspaı berispeımiz. – Komandanyń týrnırge daı­yndyǵy qalaı? Demalys jigitterdi bosatyp jibergen joq pa? – Komanda Rýdnyıǵa kezekti demalystan keıin jınaldy. Al­dymen jan-jaqty medısınalyq tekserýden óttik, «Gornıak» oıyn­shy­larynyń barlyǵy da shar bolattaı shymyr ekendigin kórsetti. Jergilikti sport bazasynda sha­maly daıyndalǵannan keıin, jigitter on kún «Sosnovyı bor» sanatorııinde boldy. Onda kúnine úsh ret jattyǵý jumysyn júr­gizdik. Rýdnyıǵa kelgen kúnniń erteńinde komanda muz aıdynyna shyqty. Jaqynda oıynshylardyń barlyǵy da jańa forma aldy, daı­yndyqty kúsheıtip, demalys­syz jumys isteýdemiz. – Jańa forma demekshi, hok­keıdiń sportsúıer qaýymǵa berer rahaty kóp bolǵanymen, ózi arzanǵa túspeıtini belgili. Rýd­nyı sııaqty shaǵyn qalada jal­py hokkeıdiń damýyn jáne «Gor­nıak» komandasyn qoldap oty­ratyn demeýshi bar ma? – Ras, hokkeı – qymbat sport. Hokkeı komandasy jaqsy nátı­je­ge jetýi úshin oǵan kúshti jattyǵý jumystary kerek, al ol qomaqty qarjysyz júzege aspaıdy. Demeýshi degende, aldymen ENRC kor­porasııasy jáne «ENRC Kómek» korporatıvtik qoryn aıtamyz. Kor­­porasııa jyl saıyn «Gornıak» hokkeı komandasyn damytýǵa shamamen 100 mıllıon teńgeden astam qarajat bóledi. Osyndaı qar­jy­laı qoldaýdyń arqasynda komanda hokkeı quraldary men sport­tyq formasyn jańalap oty­ramyz. Bı­yl komandaǵa jańa oıyn formasy alyndy, ony hokkeıshiler 10 qyr­kúıekte ótetin Qa­zaqstan chempıo­natynda kıip shyǵady. Munyń syrtynda ENRC kor­porasııasy jáne «ENRC Kómek» korporatıvtik qory tek bizdiń ob­lysta ǵana emes, elimizdiń basqa óńirinde de sporttyń keń taraýy­na qoldaý kórsetedi. Bıylǵy jy­ly korporasııa Qazaqstandaǵy sporttyq jobalar úshin 800 mıllıon teńgege jýyq demeýshilik kómek kórsetti. Al ótken jyly osy maqsatqa jalpy 765 mıllıon teńge bólgen bolatyn. Demeýshilik jóninde sóz qoz­ǵalǵanda ENRC quramyna kiretin «Sokolov-Sarybaı ken óndirý bir­lestigi» aksıonerlik qoǵamy (SSKО́B) týraly da aıtpasqa bol­maıdy. Birlestik prezıdenti Muhamedjan Turdahýnov on jyl boıy Qostanaı oblystyq shaı­ba­ly hokkeı federasııasyn basqa­ryp keledi. Bıyl kásiporyn Rýd­nyıdaǵy ashyq stadıondy qalpy­na keltirý úshin 150 mıllıon teń­ge bóldi, onda «Gornıak» maýsym aldyndaǵy jattyǵýlaryn ótkize­di. Júgirý joldary, fýtbol, voleıbol alańdary bar bul stadıon Qostanaı oblysyndaǵy eń úzdik sport nysany bolmaq. Jańa oıyn maýsymy bastalar aldynda klýbtyń ákimshiligi, jat­tyqtyrýshy-jetekshi quramy já­ne barlyq oıynshylary aty­nan ENRC korporasııasyna, «ENRC Kó­mek» korporatıvtik qoryna já­ne «SSKО́B» aksıonerlik qoǵamy men Rýdnyı qalasy ákimdigine sportty qoldaǵany jáne árqashan qasymyzdan tabylǵany úshin zor rızashylyǵymdy bildiremin. – «Gornıak» jańa maýsymda muz aıdynyna qandaı quramda shyqpaq? – Biz búginde komandaǵa jas­tardy tartýdy, oıyndy olardyń eseıýi men tájirıbe jınaqtaýyna qaraı qurýdy oılastyryp otyr­myz. Eresek sportshylardyń ta­la­by kúshti bolǵanmen, olardyń oıyn nátıjesi shamaly, kórer­men­niń delebesin qozdyra túsetin shıelenisken oıyndardy olar kór­sete bermeıdi. Al jastar oı­yn jo­lyn­da kóp eńbektenedi, jat­tyq­ty­rý­shyny jaqsy tyńdaı­dy, tez tú­sinedi. Osyǵan baıla­nysty koman­daǵa qazaqstandyq jas balalardy alǵandy durys kór­dik. О́skemen hokkeı mekte­bi­niń tórt túlegin –Aleksandr Ný­re­kany, Evgenıı Ergerdi, Aleksandr Kýrshýkti jáne Mıhaıl Lazarenkony shaqyrdyq. О́tken jyly qatarymyzǵa qosyl­ǵan ós­ke­mendik Leonıd Metalnıkov, Rınat Omarbekov jáne Vıacheslav Fedosenko «Gornıak» qura­mynda oınaıtyn bolady. Sony­men qa­tar, kórshi chelıabilik Aleksandr Shýkın, qaraǵandylyq 1993 jy­ly týǵan Artem Ivanov pen Magnıtogorskiden kelgen, 1994 jyl­ǵy Alekseı Byvalsev te komanda quramyn tolyqtyra tústi. Alekseı jastyǵyna qaramastan Reseı­diń qurama komandasynda bir­neshe ret jaqsy oıyny úshin mara­pat­talǵan jigit. Al jergilikti jigitterden shymyr bolattan soq­qan­daı Andreı Shevchenko men ózimiz úkili úmitimizge sanaıtyn Andreı Medıanıkti aıtsam da jarar. Mine, osy atalǵan jigitter burynǵy oıynshylardan kem tús­peıdi dep oılaımyn. – Oıynshylardyń ishinde esimi kórermen jadynda júretin hokkeıshiler bar ma? – Komandaǵa buryn «Gornıakta» bir emes, birneshe maýsym oı­naǵan eki oıynshy birden oraldy. Olar shabýylshy Aleksandr Obýhov pen qorǵaýshy Sergeı Lıtvınov. Bul eki jigit quramynda oı­naǵan kezde «Gornıak» Qazaqstan chempıonatynyń júldegeri jáne birinshi lıgadaǵy komandalar ara­synda Reseı birinshiliginiń («Ýral-Batys Sibir» aımaǵy) jeńimpazy atandy. Aıtpaqshy, osydan tórt jyl buryn «Gornıak» quramynda júrgende S.Lıtvınov Týrındegi Ýnıversıadada Qazaqstannyń atyn shyǵaryp, qanjyǵaǵa qola medal salyp qaıtqan edi. Bıyl jankúıerler Pavel Fılıpen­ko­nyń da oıynyn tamashalaıtyn bolady. Ol jaraqat alsa da saptan shyqqan joq, búginde jigittermen birge jattyǵýdy kúsheıt­ken. О́tken jyly muz aıdynymen qoshtasýdy oılaǵan Evgenıı Lıapýnovpen jankúıerler bıyl da kezdespek. Qysqasyn aıtqanda, komanda quramynda tájirı­be­li­ler de, «jańa periler» de bar. Eń bastysy, judyryqtaı jumylǵan jigerli ujym qurý basty maqsat. Áńgimelesken Názıra JÁRIMBETOVA, Qostanaı oblysy, Rýdnyı qalasy.