Jaramsyz jylý qazandyǵynyń kók tiregen murjasy 1962 jyly salynǵan eken. 2003 jyly atalǵan murja jaramsyz dep tabylǵan. Sony qulatý barysynda Turaq Baqanov esimdi azamat úıindiniń astynda qalyp qoıyp, qaza tapty. Al Rysqul Aıtqulov jaraqat aldy.
– Negizgi merdiger «ABK qurylys» kompanııasy bolatyn. «Altyn LTD» seriktestigi qosymsha merdiger bolyp kirisken. Murjanyń aınalasynda «Qyzylorda jylý elektr ortalyǵy» mekemesiniń birneshe ǵımaraty bolǵandyqtan, onda adamdar qyzmet etetindikten, atalǵan jumysty jeksenbi kúni jasaıyq degen sheshimge keldik. О́ıtkeni, qyzmetkerlerdiń qaýipsizdigin saqtaýymyz kerek. Barlyq jumys jospar boıynsha iske asty. Oqıǵa ornynda úsh adam jumys jasady. Biraq murja qulaǵan kezde bir adam úıindi astynda qalyp qoıdy. Ekinshisi jaraqat aldy. Qazir osy iske baılanysty qylmystyq is qozǵaldy. Máseleniń mán-jaıy áli de anyqtalady, – dedi «Qyzylorda jylý ortalyǵy» mekemesiniń dırektory Baýyrjan Madraımov.
«Oqıǵa ornyna Qyzylorda oblysy TJD jedel tobynyń tehnıkasy men qyzmetkerleri, Ońtústik aımaqtyq aeromobıldi jedel-qutqarý otrıady, órt sóndirý qyzmeti men Qyzylorda oblysy TJD apatty-qutqarý qyzmetkerleri jumyldyryldy. 60-qa jýyq qutqarýshy men on tehnıka, eki kınologııalyq esep jumys júrgizdi», deıdi oblystyq TJD tótenshe jaǵdaılardy joıý bóliminiń basshysy Baqtııar Turmanov.
Al «Altyn LTD» seriktestiginiń brıgadıri Moldaǵalı Oljaǵulov qaza bolǵan Turaq Baqanovtyń otbasyna barlyq kómek kórsetiletinin, al R.Aıtqulovtyń jaǵdaıy birqalypty ekenin aıtady. «Mundaı tosyn oqıǵadan eshkim saqtandyrylmaǵan ǵoı. Barlyǵy oılamaǵan jerden boldy», – deıdi ol. Biraq osyndaıy «Saqtansań – saqtarmyn» degen sóz de eriksiz eske túsedi eken. Jumysshylardyń tehnıkalyq qaýipsizdigi birinshi orynǵa qoıylýy kerek emes pe edi?! Al beriletin kómek otaǵasyn almastyra almaıdy ǵoı.
Erjan BAITILES,
«Egemen Qazaqstan»
QYZYLORDA
