Ol alǵashqy kezderi Novo-Pskovsk jerindegi aerodrom qyzmetiniń 466-batalony quramynda túrli mindetter atqarady. Iаǵnı, ushaqtarǵa janarmaı quıý, kólemi úlken jyljymaly sham men fashısterge qarsy strategııalyq qarýlardy kútip ustaý qyzmetin uıymdastyrý isine de Anna Vasılevna er azamattarsha atsalysady.
Keıinnen, 1943 jylǵa qaraı A.Pavlova 16-shy Áýe armııasyna aerodromdyq qyzmet kórsetýshi 319-batalonǵa aýysady. Bul jerde de ol áskerı tapsyrmadan oralǵan ushaqtardyń pýlemetin sheship alyp, tazalap, aýystyryp, onyń lentasyn oq-dárimen toltyrý isimen tynymsyz aınalysady. Tipti, ushaq akkýmýlıatorlaryn toq kózimen qýattandyrý jumystary de osy A.Pavlovanyń mindetine kirgen eken. Qan maıdandaǵy qara jumysty úlken jaýapkershilikpen atqara júrip, Anna Vasılevna «Morze» álipbıiniń negizin oqyp, úırenedi de kóp keshikpeı baılanysshy mindetin atqarýǵa kirisedi.
Don, Stalıngrad, Belarýs maıdandarynyń bel ortasynda bolǵan Anna Vasılevna Polshany azat etip, Berlındi alý kezindegi qan qasapqa da qatysady. Jastyq ǵumyrynyń biraz bóligin oq pen ottyń ortasynda ótkizgen. Anna Vasılevna, tipti, Reıhstag qabyrǵasyna esimin óz qolymen qyrnap jazǵan qyzdardyń biri eken. Ol maıdanda kórsetken batyldyǵy men erligi úshin II dárejeli «Otan soǵysy» ordenimen, «Berlındi alǵany úshin», «Stalıngradty qorǵaǵany úshin», t.b. medaldarmen marapattalǵan.
Jany jaısań boıjetken qandaı qıyn kezeńder bolsa da únemi jaıdary júretin. Onyń mundaı mineziniń ushqynyn qarýlastary onyń óleń jazýǵa qushtarlyǵymen baılanystyratyn. О́ıtkeni, surapyl soǵys jyldaryndaǵy bir sáttik demalys kezinde sarbazdar syrnaı tartyp, án salyp, bı bıleıtin. Osyndaıda Anna Vasılevna qarap qalmaı, júrek qylyn shertetin názik ıirimderge toly óleńderi men qosa, otty óleńderin de oqyp, jaýyngerlerdiń jigerin janıtyn. Otanǵa degen súıispenshiligin osylaısha óleń joldaryna sıǵyzǵan qyz, Uly Jeńistiń jaqyndaýyna ózindik úlesin qosqany sózsiz.
Beıbit zaman ornaǵan keıingi jyldarda Anna Vasılevna kommýnıstik partııa qataryna qabyldanyp, eli úshin aıanbaı eńbek etti. Solaı desek te, onyń ómiri «V boı ıdýt odnı starıkı» dep atalatyn kórkem fılmmen astasyp ketkendeı áser qaldyrady. Sebebi, soǵys jyldaryndaǵy ushqyshtardyń ómiri men erligin baıandaıtyn bul kınodaǵy oqıǵa jelisi keıipkerimizdiń kózben kórip, bastan ótkergen oqıǵalary edi.
«Meniń ómir jolym osy kınomen órilgendeı. Ony ár kórgen saıyn kózge jas almaý múmkin emes. Sol jyldarda meniń jastyq jalynym men bal-bul jaınaǵan balǵyn kúnderim qaldy. Bul kınotýyndy maǵan sonysymen de qymbat», – deıdi A.Pavlova.
Anna Vasılevna tyń ıgerý jyldarynda bizdiń elimizge kelip, turaqtap qaldy. Poshta baılanys bóliminde zeınetkerlik jasqa deıin jumys istegen ol búginde sózi nyq, qımyly shıraq qart maıdangerler qatarynda.
Nurlybek DOSYBAI,
«Egemen Qazaqstan»
ASTANA
