«Maǵan GGG-diń Dennımen ótken jekpe-jeginde jaqsy qyrynan kórine almaǵanyn, al «Kanelonyń» otandasy kishi Chaveske esh múmkindik bermegenin aıtqandar kóp boldy. Biraq mynany este saqtaıyq. Alvares Denıel emes. Shákirtim meksıkalyqqa qaraǵanda irileý, ári jyldam qozǵalatyn orta salmaqtaǵy boksshy. Al Alvarestiń jóni múldem basqa. Ol turaqty jáne rıng shetindegi arqanǵa súıenip alyp judyryqtasqandy unatady. Menińshe, Golovkınge qarsy aıqasta mundaı qoldanýǵa bolmaıdy, sebebi, GGG ony esinen tandyryp tastaýy múmkin. Bul kezdesýde Gennadıı qarsylasyn kóbirek qysymǵa alyp, sońǵy raýndtarda nokaýtpen jeńedi dep oılaımyn», dedi Andre Roze Behind The Gloves basylymyna bergen suhbatynda.
Orta salmaqtaǵy WBO nusqasy boıynsha álem chempıony Bıllı Djo Sonders te qazaqstandyq boksshynyń jeńisine senim bildirdi.
«Shyny kerek, bul aıqasta kimniń jeńiske jetetinin dál aıtý qıyndaý. Alǵashynda Golovkındi senimdi túrde jeńedi dep oılaǵanmyn. Biraq «Kanelonyń» da ózindik qýlyqtary bar», dedi Sonders.
Degenmen, ol Gennadıı Golovkındi dopıng qoldanyp keldi dep aıyptady.
«Shyndyqqa kóz júgirteıikshi. Golovkın sońǵy aıqasynda ózin eki-úsh jyl burynǵy deńgeıinde kórsete almady. Baıaý qımyldaǵanyn baıqadyq. Djeıkobspen kezdesýinde ony bes ret dopıngke qarsy synaqtan ótkizgeni sebep boldy dep oılaımyn. Gena burynǵy deńgeıinde judyryqtasa almaǵanynyń birden bir sebebi osy, bári ádil ótti», dedi BoxingScene.com basylymyna bergen suhbatynda.
Bıllı Djo Sonders osy jyldyń sońyna deıin Golovkın-Alvares aıqasynyń jeńimpazymen qolǵap túıistirgisi keletinin de jasyryp qalmady. Degenmen, ol oıyna jetý úshin aldymen 8 shilde kúni Londonda Avtandıla Hýrsıdzege qarsy jekpe-jekte tıtýlyn qorǵaý kerek ekenin aıtty.
Aıta keteıik, Golovkın-Alvares jekpe-jeginiń kúni belgili bolǵanmen, ótetin orny ázirge naqtylanbady. ESPN telearnasynyń sarapshysy Den Rafael Golden Boy Promotions promoýterlik kompanııasynyń prezıdenti Erık Gomestiń osyǵan qatysty pikirin suraǵan eken.
«Gomestiń maǵan aıtýy boıynsha birneshe arenanyń basshylarynan usynys túsken. Olardyń bári boks keshin óz stadıonynda ótkenin qalap otyr. Bul tizimde Arlıngtondaǵy (Tehas shtaty) AT&T Stadium, Las-Vegastaǵy T-Mobile Arena, Los-Andjelestegi Dodgers Stadium jáne Nıý-Iorktegi Madison Square Garden arenasy bar. Kompanııa prezıdenti jaqyn ýaqytta Oskar De La Hoııanyń (Alvarestiń promoýteri) aldaǵy aptalarda birneshe kezdesý uıymdastyryp, osy máseleni talqylaıdy», dep jazdy Den Rafael ESPN saıtyndaǵy jeke baǵanasynda.
Osy máselege qatysty Gennadıı Golovkınniń promoýteri Tom Leffler de oı bólisti.
«Bul oryndy tańdaǵan kezde aqsha máselesi birinshi orynda bolmaıdy degen oıdamyn. Sebebi, bul tarıhı kezdesý, ony búkil álem kútip otyr. О́z basym Las-Vegastyń múmkindigin joǵary baǵalar edim. Sebebi, bul arenada Golovkın áli judyryqtasqan joq. Bul onyń armany. Las-Vegasta tanymal tulǵalar kóp. Osy jerde uıymdastyrsa, olardyń bári keletin edi. Bul qalada Maık Taıson, Floıd Meıýezer, Mennı Pakıao sekildi úzdikter jekpe-jek ótkizgen.
Birer apta buryn Vladımır Klıchko men Entonı Djoshýa kezdesýinde «Ýemblı» stadıonyna 90 myń jankúıer keldi. Biz de osynsha kórermen jınaı alsaq, keremet bolar edi. Qazir osyny qarastyryp jatyrmyz. Bizge usynystar kóptep túsip jatyr.
«Dallas Kovboız» klýbynyń basshysy Djerrı Djons Golovkındi AT&T Stadium stadıonynan atalǵan komandanyń oıynyn kórýge shaqyrdy. Bul stadıonda Alvares Lıam Smıtqa qarsy kezdesý ótkizip, 50 myń jankúıer jınaǵan bolatyn. Dallastaǵy stadıonda biz 90 nemese 100 myń bılet sata alamyz degen oıdamyn», deıdi Leffler UCNLive.com basylymyna bergen suhbatynda.
Daıyndaǵan: Aıan ÁBDÝÁLI, «Egemen Qazaqstan»
