Ejelgi órkenıetterdiń ordasy, adamzat balasynyń rýhanı murasy shoǵyrlanǵan jer sanalatyn Sırııanyń qazirgi taǵdyry dúnıejúzin alańdatyp otyrǵany anyq. Sham elindegi shıelenistiń sheshimin izdep, túıinin tarqatý úshin basty taraptar, álemniń alpaýyt elderiniń ókilderi men halyqaralyq uıymdardyń delegasııasy osy maqsatta Astanaǵa taban tiredi. Álemniń 24 elinen 300-ge jýyq sheteldik BAQ ókilderi tikeleı habar taratý úshin Astanaǵa kelýge tilek bildirdi.
Jumyr jerdiń jarasyna aınalǵan shyrǵalańdy sheshýge baǵyttalǵan abyroıly ári jaýapkershiligi zor máselede tańdaýdyń Astanaǵa túskeni beker emes. Onyń astarynda Táýelsizdiktiń shırek ǵasyrynda elimizdiń syrtqy saıasattaǵy sarabdal ustanymy men san taraý izdenisteriniń jemisi jatyr.
Birinshi kezekte, árıne, Memleket basshysy N.Nazarbaevtyń halyqaralyq arenadaǵy zor bedeli, mámilegerlik qarym-qabileti moıyndalǵandyqtan da álem jurtshylyǵy Astana prosesine úlken úmitpen qarap otyr. Toqsanynshy jyldardyń basynan beri kóp vektorlyq saıasatqa súıenip, beıbitshilikti qoldaıtyn, baısaldy beıtarap ustanymyna berik ekenin aıqyn baıqatqan Qazaqstan bir-birine qyrǵıqabaq tanytyp otyrǵan talaı memleketterdiń arasynda altyn kópir bola bildi.
Onyń ústine, bıyldan bastap BUU Qaýipsizdik keńesindegi qyzmetine kirisken elimizdiń alysty jaqyndatyp, arazdy tatýlastyrýdaǵy tájirıbesi de jeterlik.
Alysqa barmaı-aq, 2010 jyly Astanada ótken EQYU sammıtinen beri Qazaqstan uıytqy bolǵan mańyzdy sharalar munyń aıqyn aıǵaǵy ispetti. Aıtalyq, elimiz 2013 jyly Iran men «5+1» halyqaralyq tobynyń arasyndaǵy kelissózderdi qabyldap, Irannyń ıadrolyq baǵdarlamasy boıynsha ýaǵdalastyqqa qol jetkizdi. Sol sııaqty 2014-2015 jyldary Ýkraınanyń ońtústik-shyǵysyndaǵy daǵdarysqa qatysty bitimgerlik bastama kóterip, kelissózderdiń tabysty aıaqtalýyna kómek kórsetti. Reseı men Túrkııa arasynda ushaqqa qatysty ýshyqqan ahýal da 2016 jyly Qazaqstan Prezıdenti N.Nazarbaevtyń aralasýymen retke keldi. Sonyń nátıjesinde búgin Reseı prezıdenti V.Pýtın men Túrkııa prezıdenti R.T.Erdoǵan Sırııaǵa baılanysty kelissózderdi ótkizýge Astanany arnaıy tańdap aldy.
Bizdińshe, munda Qazaqstannyń Eýrazııa keńistigindegi bastamashyldyǵy, Túrki keńesine uıytqy bolýy jáne Islam Yntymaqtastyq Uıymyndaǵy belsendi qyzmeti de mańyzdy ról atqarǵan sııaqty. Sonymen qatar, daǵdarysty saıası jolmen sheshýdi qarastyrýǵa beıim sırııalyq oppozısııa ókilderimen 2015 jyly mamyr men qazan aılarynda Astanada ótken kelissózder de búgingi jıynǵa degen senimdi eselegeni anyq.
Adamzat taǵdyry talqyǵa túsip, jahannyń saıası kartasy ózgerip jatqan tusta Qazaqstan qashanda BUU jarǵysynda kórsetilgen qaǵıdalarǵa saı áreket etip, memleketterdiń táýelsizdigine, shekaralarynyń myzǵymastyǵyna, túrli ulttardyń qundylyqtarynyń qorǵalýyna qurmetpen qarap keledi.
Arazdasqan toptardyń arasyna araǵaıyn bolý atalarymyzdan qalǵan ıgi dástúr deýge bolady. Sondyqtan, áseri aımaqtyq aýqymnan shyǵyp, qurlyqtyq masshtabqa jaıylǵan Sırııa máselesin sheshýge alań usyný Qazaqstannyń mámilegerlik ustanymynan týyndap otyrǵan oryndy qadam retinde baǵalandy.
Onyń ústine, keshe ǵana qyzmetine kirisken AQSh prezıdenti Donald Tramptyń terrorızmmen kúreske basymdyq beretinin málimdeýi de Astana prosesine degen úmitti eseleı túsedi.
Elordaǵa taban tiregen túrli tarap ókilderi, alystan kóz tigip otyrǵan halyqaralyq qoǵamdastyq Astana prosesine úlken úmitpen qarap otyr. Astana prosesi aldaǵy aqpan aıynda Jenevada ótkizilýi josparlanǵan kelissózderdiń tabysty bolýyna alǵyshart jasap, oń yqpalyn tıgizýge tıis. Olaı bolsa, búgin álem nazary aýǵan Astana – táýelsizdiktiń shırek ǵasyry ishinde tórtkúl dúnıeniń tórelik izdeıtin tórine aınaldy deýge tolyq negiz bar.
Darhan
QYDYRÁLI,
«Egemen Qazaqstan»
