Osyǵan oraı eń aldymen aýylsharýashylyq qurylymdary sapaly tuqym, arzandatylǵan janar-jaǵarmaı jáne qajetti tehnıkamen qamtamasyz etildi. Topyraq qunaryn saqtaýǵa qajetti basqa da agrotehnıkalyq sharalar tolyǵymen atqaryldy. Sońǵy kezde keıbir usaq sharýa qojalyqtary tyńaıtqyshtardy paıdalaný isine salǵyrt qaraı bastaǵandary da jasyryn emes. Bıyl mundaı teris tájirıbeniń tamyryna balta shabyldy. Sonymen birge, olar óz qoldaryndaǵy burynǵy eski tehnıkany jańǵyrtýda da qam-qaraket tanytýda.
Búgingi kúni bolashaq mol ónimge kepil bolarlyqtaı osyndaı ózekti máselelerdiń bárine de memlekettik turǵydan qoldaý tetikteri engizilgen. Másele sony tıimdi túrde paıdalana bilýde deýge bolady. Buǵan deıingi jyldarda oblystyń dándi daqyldar alqaptaryna sapasy ekinshi sanattan tómen, tipti keı kezderde úshinshi sanattaǵy tuqym da sebilip kelgenin joqqa shyǵarý qıyn. Al bıyl sebiletin tuqymnyń basym bóligin negizinen joǵary jáne birinshi sanattaǵy tuqym qory quraıdy.
Aqtóbe o bastan respýblıkamyzdaǵy astyq ósiretin óńirler qatarynan oryn alyp keledi. Alaıda, belgili bir kezeńde aımaqtaǵy egistik alqaptardyń kólemi qysqartylyp ketken jaǵdaılar da bolǵan. Árıne, onyń túrli obektıvti jáne sýbektıvti sebepteri de bolǵan shyǵar. Alaıda, dál búgingi kúni bir másele aıqyn. Bul – ótken 2016 jylmen salystyrǵanda bıyl oblystaǵy egistik alqaptar kólemi 74,2 myń gektarǵa ulǵaıǵany.
Osylaısha, bıylǵy jyly jalpy kólemi 641 myń gektar alqapqa egistik salý josparlanǵan. Budan alynatyn ónim mólsheri qandaı bolmaq? Bul jóninde aldyn ala boljam jasap, bal ashý qıyn, árıne. Sonyń ishinde sýarmaly egis emes, táýekelge negizdelgen, tipti kerek deseńiz, jaz kezderindegi jaýyn-shashynǵa da táýeldiligi bar egistik jaǵdaıynda qandaı da bir aıqyn joramal jasaý ońaıǵa túspeıdi. Áıtse de qazirgi kúni agrotehnıkalyq sharalar oıdaǵydaı júrgizilgen jaǵdaıda 480 myń tonna astyq jınaýǵa bolatyny jóninde esepter jasalǵan.
Sóz sońynda óńirde bel ortaǵa taıaǵan kóktemgi egistiń jaı-kúıine kelsek, astyq ósirýshilerdiń basty nazary ony sozbaı, ýaqytynda aıaqtaýǵa aýdarylǵan. Bul iste Qarǵaly aýdanynyń dıqandary kósh bastap keledi.
Temir QUSAIYN,
«Egemen Qazaqstan»
Aqtóbe oblysy
