Qyrǵyzstanda Qazaqstannyń Táýelsizdik kúnine arnalǵan qabyldaý ótti

Elimizdiń Táýelsizdik kúnine oraı Qyrǵyzstandaǵy Qazaqstannyń elshiliginde resmı qabyldaý uıymdastyryldy, dep habarlaıdy QazAqparat.

Bishkek qalasyndaǵy «Ala-Too» meıramhanasynda ótken atalǵan is-sharaǵa Qyrǵyzstandaǵy dıplomatııalyq korpýs, akkredıttelgen halyqaralyq uıymdar, zań shyǵarýshy jáne atqarýshy bılik, ǵylymı jáne shyǵarmashylyq zııalylary qatysty. Shara Qazaqstan men Qyrǵyzstannyń memlekettik ánuranyn oryndaýmen bastaldy. Qazaqstan Respýblıkasynyń Qyrǵyzstandaǵy Tótenshe jáne О́kiletti Elshisi Aıymdos Bozjigitov kelgen qonaqtardy jyly qarsy aldy. «Qazaqstan ótkizip jatqan áleýmettik jáne ekonomıkalyq reformalardyń arqasynda búginde álemniń damyǵan 50 eliniń quramyna kirip, básekege qabiletti jáne tolyqqandy memleket retinde moıyndatyp keledi. QR Prezıdenti N.Nazarbaevtyń sarabdal saıasatynyń kómegimen óziniń dara jolyn tańdap, úlken jetistikterge jetýde. Turaqty damý, etnıkaaralyq jáne konfessııaaralyq túsinistik pen toleranttylyqtyń biregeı modeli Qazaqstannyń halyqaralyq brendi bolyp tabylady», – dedi A. Bozjigitov. Sóz barysynda Memleket basshysy N.Nazarbaevtyń Ortalyq Azııa elderin ıadrolyq qarýdan azat etý týraly beıbit jáne ıntegrasııalyq bastamalary aıtyldy. Qazaqstandyq dıplomat Qarǵyzstanmen joǵary deńgeıdegi memleketaralyq ekijaqty qarym-qatynas pen bolashaqta ony ary qaraı damytý ári nyǵaıtý kerektigin atap ótti.