Jambyl Dúısenuly shyǵarmashylyq kesh ótkizdi

Astanadaǵy Ortalyq «Qazaqstan» konsert zalynda Qazaqstan Respýblıkasy Mádenıet jáne sport mınıstrliginiń qoldaýymen Jambyl Dúısenulynyń shyǵarmashylyq keshi ótti dep, habarlaıdy QR Mádenıet jáne sport mınıstrliginiń baspasóz-qyzmeti. Jambyl Dúısenuly 13 jasta. О́ziniń balǵyn jasyna qaramastan, ol úsh poezııalyq jyr jınaǵyn shyǵaryp úlgerdi. Ádebıetshilerdiń pikirinshe, onyń óleńderi tereń lırıkamen, býyndarynyń tazalyǵymen erekshelenip, qazaq poezııasynyń alyptary Jambyl Jabaev pen Muqaǵalı Maqataevtyń týyndylarymen úndestik tabýda. «Men bul keshti Táýelsizdiktiń 25 jyldyǵyna jáne Tuńǵysh Prezıdentimiz Elbasyna arnaımyn. Memleketimizge beıbitshilik pen birlik, bıik jetistikter, Elimizge máńgilik táýelsizdik tileımin!», -degen tilekterimen jas aqyn kesh shymyldyǵyn ashty. Aqynnyń keshine qazaq estradasynyń juldyzdary – Bıbigúl Tólegenova, Eskendir Hasanǵalıev, Maqpal Júnisova, Sulýshash Nurmaǵambetova, Maıra Ilııasova, Ramazan Stamǵazıev, Qaragóz Tileýbekovalar qoldaý kórsetip, jas ánshiler - Ibragım Eskendir, Beıbit Musaev, Erkebulan Elshatqyzy, Dáýlet Mahanovtar qatysty. Jas avtordyń aıtýynsha, onyń Otanǵa, Halqyna, Týǵandaryna degen mahabbaty men súıispenshiligi shyǵarmashylyǵyna degen shabytyn oıatyp, qanattandyrady.