«Bolashaq energııasy» baıqaýynyń jeńimpazy anyqtaldy

«Astana EKSPO-2017» UK» AQ QR Energetıka mınıstrligimen birlestikte qazaqstandyq ónertapqyshtar arasyndaǵy «Bolashaq energııasy» respýblıkalyq baıqaýyn qorytyndylady. Internet paıdalanýshylarynyń pikirleri boıynsha, Marat Isekeevtiń «Rotorlyq tıptegi kópdeńgeılik kópqatarly jel stansııasy» jobasy eń úzdik bolyp tanyldy. Jel stansııasy ótpe jel áserin paıdalanady, onyń esebinen qondyrǵy elektr energııasyn oǵan uqsas qondyrǵylarmen salystyrǵanda 30-50%-ǵa artyq óndiredi. Respýblıkalyq baıqaý jeńimpazyn  «Astana EKSPO-2017» UK» AQ Basqarma Tóraǵasynyń orynbasary Erbol Shormanov quttyqtady. «Biz úshin el óńirleriniń barlyǵy derlik, barlyq ǵalymdarymyz, jańashyldarymyz belsendi qatysqan bul baıqaý bizdiń elimizde ınnovasııalardyń damýyna qozǵaýshy kúsh bolatyndyǵy qýantady jáne onyń ústine 2017 jyly Qazaqstannyń EKSPO-2017 kórmesiniń bazasynda asa iri ınnovasııalyq alańǵa aınalatyndyǵyn atap ótý kóńil súısindiredi. Bizdiń otandyq ǵalymdarymyzdyń ozyq tehnologııalaryn búkil álemge kórsetýimizge múmkindik týady, osy oraıda búgin ǵalym Marat Isekeevti osy marapatymen quttyqtaý múmkindigi men úshin úlken qurmet. Onyń jobasy otandyq ǵalymdarymyzdyń 28 jobasynyń qatarynda EKSPO-2017 kórmesiniń bazasynda, Qazaqstan» pavılonyndaǵy «jasampaz energııa» aımaǵynda tanystyrylatyn  bolady», - dedi E.Shormanov. Baıqaýǵa barlyǵy júzge tarta ótinim kelip tústi. Olardyń arasynan saraptamalyq komıssııa 50 jobany iriktep aldy, olar www.yourexpo.kz saıtyna ornalastyryldy. О́nertapqyshtar men jańashyldar arasyndaǵy tartys osy saıtta ótti. Saıtta ornalastyrylǵan jobalar úshin, jalpy alǵanda, 55 myńdaı adam daýys berdi. Baıqaý jeńimpazy týraly anyqtama: Isekeev Marat Muhametqalıuly, tehnıka ǵylymdarynyń kandıdaty,  kompıýterlik tehnologııa jáne logıstıka kafedrasynyń professory, Qazaq eńbek jáne áleýmettik qatynastar akademııasy janyndaǵy «G-Global» jastar shtabynyń jetekshisi.