• 22 Jeltoqsan, 2016

38 kún qaldy

130 ret

kórsetildi

2 mın

oqý úshin

Egemen Qazaqstan

Alataýdyń baýraıynda XXVIII qysqy Ýnıversıadanyń sóreden shyǵatyn merzimine aıdan artyq ýaqyt qaldy. Qazirdiń ózinde Almatyda Stýdenttik oıyndardy qabyldaıtyn nysandardyń saqadaı-saı daıyn turǵanyn atap ótýge bolady. Budan birqatar mezgil buryn Mádenıet jáne sport mınıstrligi men Qazaqstan Respýblıkasy Stýdenttik sport federasııasy Ýnıversıadaǵa qatysýǵa úmitkerler tizimi jasalyp bitkenin jarııa etken edi. Mınıstr Arystanbek Muhamedıulynyń málimdeýinshe, qazirgi tańda atalmysh sharaǵa 227 sportshy daıyn tur. Olardyń 121-in jigitter, 106-syn qyzdar quraıdy. Búginde olarmen jattyqtyrýshylar, dárigerler, massaj jasaýshylar jumys júrgizýde. Al tizimniń ortasynda mánerlep syrǵanaýshy Denıs Ten, frıstaılshylar Iýlııa Galysheva, Pavel Kolmakov, Janbota Aldabergenova, konkıshiler Roman Krech, Stanıslav Palkın, short-trekshiler Aıdar Bekjanov, Abzal Ájiǵalıev, Nurbergen Jumaǵazıev jáne Denıs Nıkısha sekildi elimizdiń belgili sportshylary bar. Keıingi kezderi bulardyń sońǵylary – short-trekshiler shyn máninde kúlli álemdi dúrliktirip, ózderiniń attaryn jalpaq jurtqa jaqsy qyrlarynan tanytyp jatyr. Biz munyń jarqyn úlgisin sońǵy sátteri Ońtústik Koreıanyń Kannyne qalasynda márege jetken Álem kýbogynyń tórtinshi kezeńinen de kórdik. Endi Ýnıversıadada qalǵan sport túrleriniń ókilderi de ózderin bıikten kórsetetin shyǵar degen úmittemiz. Eske sala keteıik, XXVIII Dúnıejúzilik Ýnıversıada 2017 jyldyń 29 qańtary men 8 aqpany aralyǵynda Almatyda ótedi. Onyń baǵdarlamasyna mánerlep syrǵanaý, short-trek, taý shańǵysy, snoýbord, bıatlon, shańǵymen jarysý, shaıbaly hokkeı (áıelder men erler arasynda), kerlıng, shańǵymen tramplınnen sekirý, shańǵy qossaıysy, konkımen júgirý sporty, frıstaıl sekildi 12 sport túri engen. Jarystarǵa 2 myńǵa jýyq sportshy qatysady dep kútilýde. Ýnıversıada ótkiziletin ýaqytta 3 myń erikti, onyń ishinde kóptegen sheteldik eriktiler atsalysady. Stýdentter arasyndaǵy sport oıyndaryna 30 myńǵa jýyq otandyq jáne sheteldik týrıst keledi dep kútilýde. Saıystardy álemniń 80 elindegi 1 mlrd adam teledıdar arqyly tamashalamaq.