Konvensııa, kodeks jáne kelisim

Keshe Parlament Májilisiniń Tóraǵasy Nurlan Nyǵmatýlınniń jetekshiligimen palatanyń kezekti jalpy otyrysy ótip, bekitilgen kún tártibine sáıkes bes másele qaraldy. Sonyń ishinde Qazaqstan men Slovenııa úkimetteri arasynda qol qoıylǵan Tabys pen kapı­talǵa qosarlanǵan salyq salýdy boldyrmaý jáne salyq salý­dan jaltarýǵa jol bermeý týraly konvensııa men oǵan jasalǵan hattamany ratıfıkasııalaý týraly zań jobasy birshama uzaq tal­qy­lanyp, depýtattar tarapy­nan qyzyǵýshylyq týdyrdy. Zań jobasy týraly baıandama jasa­ǵan Qarjy mınıstri Baqyt Sul­tanovqa on depýtat suraq berdi. Sonyń ishinde depýtat Ábdi­manap Bekturǵanov konvensııada bir eldiń rezıdentiniń jyljymaıtyn múlikten alynatyn tabysyna ekinshi elde salyq salynýy múmkin dep kórsetilgenin aıta otyryp, bul qosarlanǵan sa­lyq bolmaı ma dep surady. Oǵan mınıstr múlik qaı elde tir­kelgen bolsa, salyqty sol mem­leket qana salatynyn aıtty. De­pýtat Evgenıı Kozlov konvensııada adamnyń eńbegine qaraı tólenetin aqylardyń birneshe túri kórsetilgenin, sonyń ishinde biz­diń memlekette eńbekaqy men zeınet­aqy ǵana baryn aıtyp, qal­ǵan aqylarǵa neler jatady dep surady. Oǵan mınıstr olardyń bári de tabysqa jatatynyn, al tabys­tyń barlyq túrinen salyq alynatynyn jetkizdi. Depýtat Záýresh Amanjolova ýaǵdalasýshy memleketterdiń birinde salyq zańnamasy ózgergen jaǵdaıda konvensııa qalaı qoldanylatyny aıtylmaǵanyna nazar aýdaryp, osyndaı jaǵdaı­da salyq qalaı salynatynyn surady. Oǵan mınıstr ataýlar ózgergenimen, salyq salý prın­sıpi ózgermeıtinin jetkizdi. Ahmet Mýradov qazaqstandyq teńiz­shiler men ushqyshtar qazir halyqaralyq deńgeılerde jumys isteý múmkindigin alǵanyn aıta kelip, eger Slovenııada sondaı adam­darymyz jumys isteıtin bol­sa, olarǵa salyq qalaı salynady dep surady. Mınıstr oǵan tabys­tardy qaı memleket tólese, salyq­ty da sol el ustaıtynyn aıtty. Osyndaı turǵydaǵy suraqtar aıaqtalǵan soń qosymsha baıandama tyńdaldy. Ony Halyq­ara­lyq ister, qorǵanys jáne qaýip­sizdik komıtetiniń múshesi Baqtyqoja Izmuhambetov jasap, zań jobasynyń budan bu­ryn da qabyldanǵan osyndaı qu­jattardan eshqandaı ózgeshe­ligi joq ekenin atap ótti. Kon­ven­sııanyń maqsaty – eki el ara­syn­da shaǵyn jáne orta bız­nesti damytýda ekonomıkalyq ynty­maqtastyqty keńeıtýge jáne ınvestısııa salýǵa qolaı­ly jaǵdaı jasaý. Barlyq komıtetterdiń oń qorytyndysy bar, qosymsha bıýdjet shyǵynyn qajet etpeıdi, dedi ol. Talqylaý barysynda zań jobasyn tutastaı maquldaý jóninde bir ǵana usynys túsip, depýtattar onymen kelisti. Osy kúni otyrys Sot-sarap­tama qyzmeti jáne Halyq densaý­l­yǵy men densaýlyq saqtaý júıe­si kodeksine ózgerister engizý týraly zań jobalaryn ekinshi oqy­lymda qarap, tutastaı ma­qul­dady. Zańnamalar sot-sarap­tama qyzmetin jetildirýge qatys­ty quqyq qorǵaý júıesin odan ári jańǵyrtýdyń 2014-2020 jyl­darǵa arnalǵan memle­ket­tik baǵdarlamasyn iske asy­rýǵa, biryńǵaı sot saraptamasy organyn qurýǵa, jeke sot sarap­shylary ınstıtýtyn damy­týǵa, sondaı-aq, sot tóreligi pro­se­sine qatysatyn azamattar men uıym­dardyń quqyqtyq qor­ǵalýyn, sot sarapshysy laýazy­my­nyń bedelin arttyrýǵa múmkindik beredi. Sondaı-aq, osy kúni Qazaqstan men Serbııa úkimetteri ara­synda Halyqaralyq avtomobıl qatynasy týraly jasalǵan keli­simdi ratıfıkasııalaý týraly zań jobasy boıynsha qorytyn­dy ázirleýge kelisim berildi. So­nymen qatar, Qazaqstan men Reseı arasynda Embi polıgonyn paıdalaný jáne jalǵa berý týraly 1995 jyldyń 20 qańtarynda jasalǵan kelisimdi jáne osy polıgondy jaldaý týraly shart­tyń qoldanysyn toqtatý jónin­de 1996 jyldyń 18 qazanynda jasalǵan hattamany ratıfıkasııa­laý týraly zań jobasy boıynsha da qorytyndy ázirleýge ýaqyt belgilendi. Kún tártibindegi máseleler qaralyp bolǵan soń depýtattardyń ortalyq atqarýshy bılik organdaryna jasaǵan saýaldary jarııa etildi. Jaqsybaı SAMRAT, «Egemen Qazaqstan»