OQO TJ departamentine jańa tehnıka berildi

Búgin oblystyq Tótenshe jaǵdaılar departamentiniń órt sóndirý jáne avarııalyq qutqarý qyzmeti memlekettik mekemesine oblys ákimi Janseıit Túımebaev jańa tehnıkanyń kiltin tabystady, dep habarlady OQO baspasóz qyzmeti. «Tótenshe jaǵdaılardyń aldyn alyp, ter tógip júrgen sizderdiń eńbekterińiz zor. Oblystyq tótenshe jaǵdaılar departamenti bazasy jyl sanap jaqsara túsýde. Osy maqsatta jergilikti bıýdjetten bıyl 269 mıllıon teńge qarajat bólindi. Búgin de, mine, jumystaryńyzǵa asa qajetti 7 kóliktiń kiltin tapsyrǵaly otyrmyn. Kelesi 2017 jyly osy baǵyttaǵy jumystar jalǵasyn tabady, bul maqsatta oblys bıýdjetinen 427 mln teńge qarastyrylýda», - dedi  óńir basshysy Janseıit Qanseıituly. Shara barysynda oblys ákimi eki qyzmetkerdi «Oblysqa sińirgen eńbegi úshin» medalimen marapattasa, qos órt sóndirýshige gramota tabys etti. Bir aıta keterligi, órt sóndirý jáne avarııalyq qutqarý qyzmeti memlekettik mekemesinde 181 birlik órt sóndirý tehnıkasy bar. Onyń 121-i órt sóndirý, 22- si arnaıy, 38 birligi kómekshi avtokólikter. Osy tehnıkalardyń 93-i  20 jyldan astam ýaqyt paıdalanylypty.