Almatynyń «Qaırat» komandasynda óner kórsetetin ıvýar oıynshysy Jerar Goý qyzyqty suhbat berdi. Sóz arasynda ol «Almatydaǵy óz stadıonymyzda oınaǵan qatty unaıdy. Jankúıerlerimizdiń qoldaýynan erekshe shabyt alyp, bar ónerimdi pash etkennen asqan baqyt joq», – dep óz áserimen bólisti. Bul týraly fckairat.com habarlady.
Álemge áıgili qandaı aıaqdopshylarmen bir komandada oınaǵyń keledi degen suraqqa: «Men onsyz da tanymal fýtbolshylarmen oınap júrmin. Anatolıı Tımoshýk, Andreı Arshavın bir kezderi Eýropa arenasynda atoı salǵan jigitterdiń biri bolatyn. Qazir bizben birge. Buǵan deıin usaq komandalarda oınaǵanmyn. Búginde jaǵdaıym áldeqaıda keremet», – dedi ıvýar oıynshysy.
«Kelisimshartymnyń aıaqtalýyna týra bir jyl qaldy. Ony ary qaraı uzartýym úlken basshymyzǵa baılanysty. Tańdaý erki ózimde bolsa, Almatyda qýana-qýana qalar edim. Biz úlken otbasy sııaqtymyz. Aǵaıyndylardyń arasynda qandaı baılanys bolsa, biz de dál solaı aralasamyz», – dedi Jerar Goý.
Fýtbolshylardyń esinde qalar bir goly bolady. Mysaly, Argentınanyń áıgili shabýylshysy Lıonel Messı kezekti Eýropanyń úzdik oıynshysyna beriletin syılyqty alar tusta Chempıondar lıgasynyń 2009 jylǵy fınalynda «Manchester Iýnaıtedke» soqqan dobyn ataǵan bolatyn. Al Goýdyń qaı goly esinde qalypty?
«Qaı golymnyń mańyzy joǵary ekenin oılanbappyn. Menińshe, báriniń orny erekshe. Sebebi, alańǵa shyqqandaǵy basty jumysym – qarsy qaqpaǵa dop soǵý. Ylǵı da ózime ózim «sen tek qana gol salý kereksiń» dep júremin. Bir matchta poker (4 gol) jasasam da maǵan azdyq etip turady», – dedi ol.
Ár adamnyń minezi árqıly. Ivýarııalyq sportshy áriptesteri jóninde pikirin bildirdi:
«Ujymymyz qaljyńdy jaqsy kóredi. Ásirese, Anatolıı Tımoshýk pen Qýat Islambek óte kóńildi júredi. Ázilim jarasqan dostarymnyń biri osy eki jigit. Qýat ylǵı da kúrespek bolyp, maǵan qaraı umtylady. Biraq onysynan túk shyqpaıdy. Al Tımoshýktyń jasynyń úlkendigine bola «Eı, ata» dep qaǵytamyz», – dedi Goý.
27 jastaǵy fýtbolshynyń bir ereksheligi kóńil kóterip, saýyq-saıran qurǵandy unatpaıdy eken. «Men qydyrǵandy asa qatty unatpaımyn. Matchtan keıin nemese jattyǵýlar aıaqtalǵan soń óz úıimde bolǵandy unatamyn. Dostarym shaqyrǵanda bolmasa meni izdegen jan úıimnen ǵana taba alady», – dedi ol.
Fýtbolǵa jany qumar adamnyń tanymal aıaqdopshylarǵa elikteıtini o bastan belgili. Olardyń qatarynda kásibı fýtbolshylar da joq emes. Al Jerardyń pir tutar oıynshysy kim eken?
«Ol qazir fýtboldaǵy mansabyn aıaqtaǵan. Bul sportqa alǵash qadam basqanda brazılııalyq Ronaldonyń oıynyn súıip kóretinmin. Keıinirek otandasym, «Chelsıdiń» ańyzyna aınalǵan Dıde Drogbaǵa da qyzyǵatyn boldym», – dedi ol.
Qazaqstanǵa kelgenge deıin Jerar Goý Túrkııanyń 1 lıgasynda da óner kórsetken. Suhbat barysynda ol eki chempıonatty salystyryp, óz baǵasyn berdi.
«Menińshe, Túrkııa birinshiligi myqtyraq. Chempıondyq ataq úshin birneshe komanda jan alyp, jan berýge daıyn turady. Al Qazaqstanda 2-3 klýb belsendilik tanytsa, qalǵandary laıyqty oıyn kórsete almaıdy. Naqtyraq aıtqanda, sońǵy jyldary tek «Qaırat» pen «Astanany» ǵana kórip júrmiz. Mine, qos eldiń fýtbolyndaǵy aıyrmashylyq osyda. Biraq osy qarqynymen jalǵastyrar bolsa, Qazaqstan chempıonaty damıtynyna senimim mol», – deıdi fýtbolshy.
Suhbat barysynda Jerer Goý alǵash ret mańdaı terimen tapqan aqshasy týraly, ony qaıda jumsaǵany týraly da aıtty.
«Tepe-teń bólip, áke-shesheme berdim (kúlimsirep otyryp, esine aldy). Ol kezdegi sezimimdi sózben aıtyp jetkize almaımyn. Ata-anama kishkene de bolsyn septigimdi tıgizginime qýandym», – deıdi «Qaırat» oıynshysy.
Kásibı fýtbolǵa qadam basqan sportshy mansaby aıaqtalǵanǵa deıin alańnyń bir bóliginde ǵana óner kórsetpeıtini belgili. Máselen, Ispanııanyń «Barselona» sapynda ortalyq qorǵaýshy bolyp júrgen Jerar Pıke bir kezderi ortalyq shabýylshy bolypty. Al «Realdyń» qazirgi juldyzdarynyń biri Garet Beıl «Totenhemde» júrgeninde sol qaptaldyń qorǵaýshysy bolǵan. Jerar Goý da óz pozısııasyn birneshe ret aýystyrypty:
«Bala kúnimde ortalyq qorǵaýshy retinde bastadym. Sodan keıin sol qaptalǵa aýystym. Kóp uzamaı ortalyq jartylaı qorǵaýshy boldym. Bir kúni jattyqtyrýshym kelip, «Seniń dene turqyń iri, kúshiń de kóp. Alǵa shyq ta baryp, gol soq. Qandaı nátıje kórsetetiniń mańyzdy emes. Aıtqanymdy orynda. Endi meniń shabýylshym bolasyń» dedi. Mine, osydan keıin forvard retinde ózimdi jaqsy qyrymnan kórsete bastadym», – dedi Goý.
Fýtbolshylar arasynda qyzyq bir jaıt bar. О́z komandasy qandaı da bir jetistikke jetse, sonyń qurmetine dep shashyn basqa túske boıap alady, tipti taqyrlap alyp tastaıdy nemese denesine tatý sýret salyp alady.
«Men musylman adammyn. Senimime baılanysty tánime sýret sala almaımyn. Eger Qazaqstan birinshiliginde chempıon bolsaq nemese Eýropa lıgasy men Chempıondar lıgasynyń bireýiniń toptyq kezeńine joldama alsaq fransııalyq Pol Pogba sekildi shash úlgime ózgeris engizemin be dep oılap otyrmyn», – dedi.
Jerar Goýdyń talantyna shúbá keltirýge bolmas. El birinshiliginiń sońǵy eki maýsymynda 22 goldan soǵyp, bombardır atandy. Jankúıerlerdiń biri Qazaqstan ulttyq quramasynyń sapynda óner kórsetkisi keledi me degen suraqqa: «Shynymdy aıtsam, bilmeımin. Eger munda taǵy bir jylǵa qalsam, azamattyq alýǵa múmkindigim bolady. Al eger shaqyrtý túsip jatsa, bas tartpaıtynym anyq. Qaıta mundaı múmkindiktiń bolǵanyna qýanar edim. Al óz elimniń quramasyna keler bolsam, ol jaqqa joldama alý qıynnyń qıyny. Maǵan qaraǵanda tájirıbesi kóp fýtbolshylar jeterlik», – dedi «Qaırat» shabýylshysy.
Goý «Qaırat» sapynda júrip, umytylmastaı bolyp qalǵan matchy esine túsirip, suhbatyn qorytyndylady.
«О́tken jyly Almatydaǵy «Bordoǵa» qarsy kezdesýdi eshqashan umytpaspyn. Bizge kishkene ǵana sáttilik jetispedi. Azdap jınaqylyq tanytqanymyzda óz tarıhymyzda alǵash ret Eýropa lıgasynyń toptyq kezeńine joldama alar edik», – dep aıaqtady sózin.
