Djeıkobs: Golovkın menimen judyryqtasatynyn umytyp ketken syńaıly

Gennadıı Golovkınniń kezekti qarsylasy amerıkalyq Denıel Djeıkobs BoxingScene-ge suhbat berdi. Bul týraly vesti.kz habarlady. 2017 jyly Golovkın meksıkalyq Saýl «Kanelo» Alvarespen jekpe-jek ótkizýi tıis. Eki tarap áli kelissózder júrgizip jatyr. Aldyn ala taraǵan málimetter boıynsha bul kezdesý qyrkúıek aıynda ótýi múmkin. Qazaqstandyq boksshy oǵan deıin 18 naýryzda Nıý-Iork qalasyndaǵy Madison Square Garden arenasynda amerıkalyq Denıel Djeıkbospen qolǵap túıistiredi. Buǵan qosa, amerıkalyq sportshy Gennadııdiń barlyq belbeýin tartyp alyp, álemdi tań qaldyratynyn aıtqan bolatyn. «Shynymdy aıtsam, alda bolar Golovkın men Alvarestiń kezdesýi meni múldem qyzyqtyrmaıdy. Shamasy, Gennadıı birinshi menimen judyryqtasatynyn umytyp ketken syńaıly. Degenmen, mundaı jaǵdaı meniń basymda buǵan deıin de bolǵan. Pıter Kýıllın jaıly aıtqym kelip otyr. Ol meni jeńip, ary qaraı GGG sııaqty úlken jekpe-jekter týraly josparlap júrgen. Biraq bári basqasha órbidi», – dedi amerıkalyq sportshy. «Qazirgi basty maqsatym – 18 naýryzǵa tyńǵylyqty daıyndalyp, laıyqty óner kórsetý. Bul úlken jekpe-jek. Sharshy alańda 36 mınýt (12 raýnd) shydas berip, qajetti nátıjege qol jetkizgim keledi. Al qalǵany bos áńgime», – dedi ol. Aıta keteıik, Djeıkobs buǵan deıin Golovkınniń Kell Brýkpen ótkizgen urysynda qatelikterin baıqaǵanyn, ony brıtanııalyqqa qaraǵanda tıimdi paıdalanatynyn málimdegen bolatyn.